Israel-Gaza buainaah Salah ngawi mai mai thei loin a \awngchhuak

Israel-Gaza buainaah Salah ngawi mai mai thei loin a tawngchhuak
Thawhtanni international friendly match pakhata Egypt leh Algeria inhmachhawn vuakveta media a hmachhawn tumin Liverpool leh Egypt forward Mohamed Salah chuan tunlaia Israel-in Gaza a beih boruak a sawichhuak a, khawvel ram hrang hrang hruaitute chu pawi-sawilote nunna suat a nih zui zel lohna’na tangho turin a sawm.
Thawhlehni zana Gaza City-a Baptist damdawi in (Al-Ahli Arab Hospital) bomb hmanga beihnaah khan mi za tel an thi tih health official-te chuan an sawi a; kha thil thlentirtuah khan Israel leh an leidote an inpuhtawn mek laiin kha pawikhawihna lian tak khan khan engtia zau nge he inbeihna kal mekah hian a nghawng a neih dawn sawi mai theih la ni lo mah se pa tawng zawt zawt lo Salah-te meuh pawh an ngawi thei ta bik lo a ni!
Kum 31 mi Salah hian Gaza huam chhunga chhawmdawlna a luh thuai chu tihmakmawh a nih thu sawi chungin he inbeihna hian tharum thawhna, rilru kehchhiat vekna leh rapthlak uchuaka insuasamna a keng tel tih a sawilang tel.
Palestinian official-te chuan Al-Ahli Arab Hospital beihna kha Israeli air strike kuthnu ngei niin an puh a; hetih lai hian Israel sipaite chuan Palestinian Islamic Jihad rocket kahsualin damdawi in a deng fuh niin an sawi ve thung a, a finfiahna video leh an hmelmate inbiakna nen lam social media lamah an tichhuak a, inpuhna lian tak a chhuak zui ta a ni.
News danga kan hmuh leh hriat angin, tunthla, October ni 7 khan Israel hmelma kumhlun Palestinian hel pawl Hamas chuan Israel ram thawng thutin, tui, khawmual leh van boruak atanga Israel ram chin lutin mi 1,400 zet an thah tlin bakah a nung chungin mi 100 chuang an man a; Israel thinrim beilet hian indo thlawhna leh laipui hmangin Gaza City-a Hamas hmun leh hma an bei mek a, Israel chetna avang hian mi 3,000 chuang an thi tawh nia sawi a ni a, mi sang telin Gaza an chhuahsan tawh bawk.
He inbeihna kal meka pawi-khawihna lian leh langsarber ni ta chu tunhnai maia damdawi in beihna hi niin, hemi chungchang hi Salah pawhin sawichhuakin, rapthlak a tih thu a auchhuahpui a, chutih rualin Gaza mipuite tana chhawmdawlna a ngaihpawimawh thu social media platform pakhat X-ah video post hmanga tarlang telin, “Gaza mipuite hian hmanhmawh takin chaw, tui leh damdawi an mamawh a; nunna zawng zawng hi a hluin, venhim ngei tur a ni. He insuatna kal mek hi kan tihtawp vat a ngai. Chhungkaw tamtak an inthendarh mek a ni.
“Khawvel hruaitu hrang hrangte ka ngen duh chu pawisawi lo nunna venghim tura hrui khat vuana ke penho hi a ni. Mihring ber hi pawisak tur a ni,” a ti.
Nilaini khan Algerian football federation pawhin thuchhuah siamin, Palestinian mipuite an thlawpzia lantirna’n an ram chhunga football competition leh match khelh tur zawng zawng an thulh tih an puang.
He rama football thuneitu sangber hian a hma lawkin Palestine national team football match khelh hmabakho chu an rama khelh an phalsak thu an lo puang tawh a, hei hi Palestinian FA ngenna an tihhlawhtlinna a ni.