Hamas hruaitu senior tak chuan October ni 7-a Hamas ten Israel an bei chu ualau takin a fak a, Palestinian group i.e., Hamas te hian khatiang chiah khan Israel hi a ral rak thlengin kan la bei leh dawn a ni tiin a sawi. The Times of Israel chuan Ghazi Hamad-an uar taka Israel a vauna thu report a pe a ni. Lebanese Television channel LBC chuan Ghazi Hamad, Hamas political hotupa chu an interview-a, he interview-na hi Middle East Media Research Institute (MEMRI) chuan letlingin an tichhuak a ni. Hamid chuan, “Israel chu ram a ni a mahse kan ramah hian hmun a nei lo. Kan dah bo tur a ni a chhan chu Arab leh Islam ram te tan security te, military te leh politics thilah te chhiatna tawp thlentu a ni. Hemi ka sawi avang hian kan zam tihna a ni lo,” tiin a sawi a ni. Hamad chuan sawi belh zelin Israel ram awm ve hi a rem lo a ni, chuvangin Palestinian ram atangin kan thai bo tur a ni, Hamas han tih hian Golan Heights tel lo in West Bank, Gaza leh Israel te hi a huam a ni, tiin a sawi bawk. Hemi awmzia chu Israel nuai chimih vek tihna em ni? tih zawhna chu “Aw, tehreng mai” tiin a chhang a ni. “Israel hi zirlai bung thar kan zirtir a ngai a ni, vawi hnih emaw vawi thum dang emaw kan la ti leh ang. The Al-Aqsa Deluge, tih hi Hamas ten October 7-a Israel an beihna hming an vuah a niin a vawi khatna chauh a ni a, vawi hnihna, vawi thumna leh vawi lina te a la awm leh ang,” tiin a sawi a ni.
The Times of Israel-in a report danin Israel mipui pawisawilote beihna ah hian hel pawl Hamas hotute thupek a nih angin hel pawl thiltih a ni ngei a ni tih finfiahna a awm thu an sawi a ni. UK, Foreign Secretary James Cleverly chuan Israel tan pah chungin ti hian a sawi a, “Engtin nge Hamas ten Israel nuai chimih vek duh reng chung siin muanna a awm theih ang?” tiin. US Presidential candidate Nikki Haley chuan sawi ve leh in, “Rawlrala che thinte hian tunge an nih an hrilh chiah che u in ring rawh u. Hei vang hi a ni Hamas te hi nuai chimih an nih vek hma chu inkahhai hi a awm lo ang,” a ti ve bawk. October 7 khan Hamas hel te zing atangin mi 3,000 lai maiin Gaza Strip atangin Israel an lut ru a, hemi avang hian nunna tam takin an chan phah a ni. Israel chuan sipai tha chakna hmangin nasa takin beihpui a thlak nghal a, Hamas ho inphenna bungrua leh Hamas ho nuaibo vek a tum hle a ni. Khawvel ram hrang hrang ten Hamas-in Israel a beihna ah hian Israel chu an tan hle a ni.
Israel hi thil kan zirtir a ngai-Hamas
