Israel hnam hla an ‘boo’ khum!

Israel hnam hla an ‘boo’ khum!
Ningani zan Nations League game pakhata mualneitu France nen goal awm loa an inhnehtawk tumin Israel duhlotute’n Paris khawpui Saint-Denis district-a France ram khelmual pui ber Stade de France-a mikhual hnam hla an chhuah laiin French fan engemawzatin diriamna an lantir a, Israel national anthem sak laiin an ‘boo’ khum hluah hluah!
France hi kumin Olympic Games opening ceremony lai khan kristian-te diriam kawngah an hmingchhe hle a; Europe ram thenkhat ang bawkin muslim pemlutin an chiahpiah nasa hle a, he’ng mite hian Palestine mipui thlawpin Israel huatna an lantir a; stadium chhung thutnaah buaina tenau a chhuak bawk.
Israel fan thenkhat chu Israel leh French hnam puanzar rawngin an inthuam a; fans pahnih chuan an t-shirt hak hma lamah Israeli club club Maccabi Tel Aviv logo chhukaiin, an kawr hnung lamah thuziak “Ni Oubli Ni Pardon” (Never Forgive Never Forget) tih an nemkai bawk.
Kan hriat angin, nikum October thla khan muslim firfiak Hamas-ho chuan Israel ram runin, mi tamtak an that a, mi 100 chuang an hreng zui bawk a; kha thil avanga Israel phuba lakna a nasa tawh hle a, thlawptu an awm laiin dodalna pawh a lian hle a, football stadium chhungah pawh Gaza indona chuan hlet a chhuah ta zel a ni!
.France rama Nations League Group Stage match-ah hian Israel fans leh security staff-te inbakkaih hmuh tur awm bawkin, Gaza war hian khelmualah pawh Israel-te tan indona a thlen kal mek a tih theih ang!
Karliamta mai khan Europa League game khela zinchhuak Maccabi Tel Aviv zuitu Juda-ho chuan Amsterdam khawpuiah buaina an lo tawk tawh bawk a, tualchhung pawl thenkhat leh Maccabi fans intihbuaina hi a sosang viau a, Amsterdam khawlaia inbeihnaah khan hriat theih chinah mi panga chuan hliam an tuar a, rinhlelh mi 70 dawn man niin, Israel sawrkar chuan an mi leh sate hruaihaw turin thlawhna a tirchhuak hial a ni.
Netherlands ram buaina ang kha a chhuah ve hlauin Ningani zan inkhel kha French security mi leh sa 4,000 ngawtin stadium chhung leh pawnah an thutchilh a, public transport lamah pawh uluk takin venhimna kalpui a ni bawk.
Israel fans zinchhuak zinga mi 100 zet kha an ram sawrkar-in sports thila zinchhuak lo tura ‘warning’ a pek ni mah se an zawm duh lo a; mipui 80,000 lenna stadium-ah mikhual fans hian buaina an pumpelh zo ta chuang lo a, venghimtute nen an inchaibuai ngial a ni.
Venhiman chungchangah hlauhthawnna a lian deuh bawk a, Ningani zan inkhel en tur khan stadium chhungah mipui 16,611 chauh lutkhawmin, kum 1998-a Stade de France hawn a nih hnuah tun kha France ram stadium pui bera Les Bleus inkhelin tawiawmtu a neih tlem ber tum a ni ta nghe nghe!
Israel hnam hla sak laia ‘boo’ leh auhnawmnah thawm dang a rikchhuah laiin Israeli fans lam chuan balloon eng vai chungin Hamas fiarfiakte’n an la hrenbeh mek an chipuite chhuah phutna an auchhuahpui ve bawk.
Inkhel tan hma atangin boruak a lum hle a, Paris khawpuia an hmun hulum laiah Israel dodaltu engemawzat fuankhawmin Palestinian flag an vai a, Lebanese leh Algerian thenkhat pawhin he match hi an dodal ve bawk.
Banner pakhatah chuan Gaza war tinzawn chungin insuatna kalpui mektu ram nena inkhelh an duh lo (We don’t play with genocide) tih an nemkai.
Inkhelh banah stadium chhung chhim lam chhuahna laiah Palestinian flag pahnih hmuh tur a awm bawk.
He match hi a hmunah France president hlui pahnih Francois Hollande leh Nicolas Sarkozy-te’n an thlir.
A behbawm lamah kan kual rei ta a, inkhel luhchilh teh ang.
Stade de France-ah hian captain Kylian Mbappe hmuh tur a awm lo a, hliam vangin player langsar dang Ousmane Dembele an chhawr thei lo bawk a, France tlarhma a hriam lo.
Forward mal tla Randal Kolo Muani a hlauhawm zo lo a, a sir lama tankhawh Bradley Barcola leh Michael Olise-te paw’n mikhual team tan hlauhawm siamchhuah an harsat.
|an atanga minute 19-naah Muani hian a chance hmasaber hmuin a ball tauh chu mikhual goal-veng Daniel Peretz chuan a dansak.
Inkhel thununtu zawk France hian minute 77-ah hmahruaina goal an hlawhchhuak teuh hle a, mahse, Peretz bawkin Warren Zaire Emery goal tur a dansak leh.
Second-half substitute Marcus Thuram-a tauhluh tur pawh a ban hmangin Peretz chuan a lo dang a; hun pekbelha khelmual lut Christopher Nkunku pawhin danglamna a thlen zo ta bik lo.
Nikum June thla hnu lamah tun kha Paris hmar lam veng khelmual ropuia Les Bleus inkhelh leh vawikhatna niin, an kawtkaiah khel tha chiam lo mah se Group A2 table-ah pahnihna tal an la luah pha.
Game nga khelh tawh atangin France khan point 10 nei tawhin, Ningani inkhel danga sikhat faia mualneitu Belgium hneh thei Italy lakah point thumin an hniam a, Pathianni hian Milan khawpuiah France hian Azzurri an luhkhung zui leh dawn a ni.