Israel Prime Minister Benjamin Netanyahu chuan khawvel ram hrang hrang ten insum tura nawrna an siam laiin Israel chuan Iran chhanlet dan turah thutlukna a siam mai dawn a ti.
Israel military te chuan Iran in missile leh drone hmanga kar kaltaa a beihna chu phuba an lak ngei tur thu an puang tawh a ni.
Washington leh Brussels te chuan Iran chu nasa zawkin an hrekbelh nghal bawk a. British Foreign Secretary David Cameron leh German foreign minister Annalena Baerbock te chuan Israel an tlawh zui nghal bawk.
Netanyahu chuan minister te hnenah Israel chuan ‘mahni inveng turin dikn a nei a ni’ tiin a lo hrilh a ni.
Cameron leh Baerbock te chuan rawtna leh thurawn hrang hrang an pek laiin Netanyahu chuan, “Ka sawi chian duh chu keimahni ngeiin thutlukna kan siam ang,” a ti.
Cameron chuan, “Buaina nasa zawk pumpelh a nih hlan kan nghak hlel a, kan thain Israel hian lu chauh ni lo thinlung nena thutlukna siam turin kan ngen a ni,” a ti thung a.
Baerbock pawhin ‘helai region-ah indona zau zawk a chhuak a nih chuan a kal zel dan tur chu sawi lawk theih a ni dawn lo’ tiin a sawi.
Tehran chuan kar kalta Inrinni khan tun thla tir lama Israel ni ngeia ngaihin Damascus a a consulate building missile hmanga beiha a general pahnih nunna chan phuba lak nan Israel chu drone leh missile hmangin a bei a ni.
Hetih lai hian Iran president Ebrahim Raisi chuan Israel-in phuba laa a bei zui a nih chuan a aia nasa daihin an chhang let ang tiin a sawi.
Hetih lai hian Israel thian tha ber United States chuan Israel in Iran a bei a nih chuan indonaah a tel dawn lo a ti a. Mahse, Iran missile leh drone programme te mai bakah Islamic Revolutionary Guard Corps leh Iranian Defence Ministry chu nasa zawkin hrekna a kalpui dawn a ti thung.
EU foreign policy chief Josep Borrell pawhin Brussels chuan Iran hrekna nasa zawka kalpui a tum tia sawiin chung zingah chuan Russia leh Middle East a aproxy group te hnena drone leh ralthuam dang a pek te pawh huam teltir tum a ni a ti.
Baerbock pawhin Berlin leh Brussels chuan Iranian drone te chu hrek an remti tia sawiin chu mai bakah missile technology te pawh huam teltir an tum a ti bawk.
Khawvel ram hrang hrangte chuan Israel chu Iran laka phuba la lo turin an ngen reng thung a ni.
Israel-in chhang let dawn
