Israel-in Gaza a Al-Shifa-ah tunnel hmu ti

Israel sipaite chuan 7 October a Hamas tena Israel an beiha an mi mante chu Gaza-a damdawi In lian berah an thukru zui tiin a sawi.
Israel sipai thupuangtu chuan he damdawi Inah ngei hian Israel sipai pakhat chu an tihlum an ti bawk a.
Cpl Noa Marcoiano kum 19 a upa chu al-Shifa hospital-ah hian hruai a nih hnuah an tihlum tiin a sawi bawk.
Israel chuan damdawi in an luhchhuah hnuah Hamas command centre an hmuhchhuah thu an sawi bawk a.
“Noa chhungte hnenah pawh kan thil hmuh leh hriat dan kan hrilh tawh a. Noa kha Shifa bulah man a nih hnuah an hruai a ni” tiin Rear Adm Daniel Hagari, IDF chief spokesperson chuan a sawi a.
“IDF air strike laiin Hamas firfiak Noa mantu chu a thi a, Noa pawhin hliam tenau tuarin Shifa damdawi in panpui a nih hnuah, he damdawi in ngeiah hian Hamas terrorist in a tihlum zui a ni” tiin a tarlang bawk.
Hamas te chuan a hmain Marciano chu 9 November-a Israel air strike avangin a thi an lo ti tawh thung.
Rear Adm Hagari chuan CCTV footage tichhuak nghalin chu chu 7 October a mi niin Hamas tena southern Israel an beih a, Israeli 1,200 chuang tihluma mi 240 an man ni taka thil thleng a ni a.
Video-ah chuan mi man pahnih te chu Gaza-a damdawi in lian leh changkang bera an hruai luh lai niin CCTV video-ah hian ralthuam kengte pawh langin mi man pakhat chu a tal nasa hle a, pakhat chu stretcher hmanga nawrluh a ni thung.
Israel video release chungchangah Gaza-a Hamas-run health ministry chuan a dik leh a dik loh an sawi mai theihloh thu an sawi thung a. Ministry chuan Gaza-a health service chhiat veknaah Israel chu mawphurtu a ni an ti bawk.
Heng bakah hian IF te chuan damdawi in chhungah 10m (33 ft) hnuailamah tunnel thlalak an tichhuak tel bawk a. Chungte chu Hamas ten hospital complex chu an terrorist infrastructure leh activity te thup nana an hman a nihzia finfiahna an ti bawk.
US pawhin a hmain a intelligence te chuan Hamas tena Gaza Strip-a damdawi inte chu command centre leh ralthuam dahthat nana an hman thu an sawi thu a lo sawi tawh bawk.
Hetihlai hian Hamas-run health ministry chuan Gaza-a nunna chan 12,300 an tling tawh tia sawiin mi 2,000 te chu an chin hriat lohin an awm mek a ti bawk a.
Chutihrual chuan Israeli Prime Minister Benjamin Netanyahu pawh Hamas tena an hren chhung leh khat ten chhuah zalen an nih theih nana nasa zawka chetla turin an nawr bawk.
Mahse, Prime Minister Benjamin Netanyahu chuan indonaa an ngaih pawimawh ber chu Hamas te chhutchhiat vek a ni a, pahnihna chu Hamas-te man chhuah zalen leh pathumna chu Gaza atanga vauna awm thei engkim nuaibo vek a ni a ti.