Israel-in Gaza a beih thar lehah mi 33 thi

Israel-in Gaza a beih thar lehah mi 33 thi
Israeli-ten Thawhlehni zana Gaza an kah thar lehnaah Palestinian 33 an thi niin Hamas hnuaia Civil Defence agency leh damdawi inten an sawi.
Israel hian US ruahman anga inkahhai inremna an neih chu Hamas-in an bawhchhia nia puhin an bei leh a ni.
Israeli defence minister chuan Hamas hian Thawhlehni khan Gaza chhim lamah Israeli sipai an that a, mi hren thi tawh ruang kir tura an inremna pawh an bawhchhe bawk niin a sawi a. Hamas erawh chuan engmah inremna bawhchhiat an neih loh thu an sawi thung.
US President Donald Trump-a chuan inkahhai mekah ‘thil duhawm lo’ a thleng lo tih a la sawi a; mahse, an sipaite beih an nih erawh chuan Israel-in ‘a chhang let dawn’ tih a sawi.
Israeli-te hian Gaza hmar lama Gaza City leh Beit Lahia, lailia Bureij leh Nuseirat leh chhim lama Khan Younis-ah te in, sikul leh residential building te an kap niin hmutute chuan an sawi.
Gaza City-ah hian mei leh a khu a nasa a, thil puak ring tak tak pawh hriat tur a awm tih hmututen an sawi.
Civil Defence thupuangtu chuan khawpuiah hian mi 14 an thi thu leh chhim lama Sabra vengah hmeichhe pathum leh mipa pakhat dama lak chhuah an ni tih a sawi.
Bureij refugee camp-ah chhungkaw khata mi panga an thi a. Khan Younis khawpui hmarthlang lama lirthei tlan lai thlawhnain a kah fuhah mi panga an thi tih a sawi bawk.
Thawhlehni zan khan Israeli Prime Minister Benjamin Netanyahu-a pisa chuan a sipaite chu Gaza ‘na taka chhu turin’ thu pek tihchhuah a ni a, a chhan mumal tak erawh sawi a ni lo.
Hetih lai hian defence minister chuan Hamas hian Thawhlehniah Gaza-ah Israeli sipai an that a, ‘tiam chin an pel’ niin a sawi.
“Hamas hian sipai an beih leh mi hren an kir thei lo a nih chuan na takin kan chhang let ang,” a ti.
Hamas hian Israeli sipai beihnaah an tel lo tih an sawi a, Israeli-ten Gaza an bei leh chu an dem thu an sawi.
An sipai pawl chuan Israel-in inkahhai ‘an bawhchhiat’ vangin mi hren ruang an an kir tur an tikhawtlai dawn tih an sawi ve.
Tharum thawhna thleng thar leh mah se US chuan inkahhai chu a ngaiin a la kal tih a sawi a. Air Force One atangin President Trump-a chuan, “Israeli sipai thah a ni a, Israeli-ten an chhang let a, an chhang let tur pawh a ni,” a ti.
Vice-President JD Vance-a pawhin inkahhai chu a la ding reng a, ‘buaina tenau’ chauh a nih thu a sawi.
Israel leh Hamas hian Gaza-ah kum hnih an indo hnuah October 10 khan inkahhai an puang a, hemi hnuah hian a bawhchhe zawkah an inpuh tawn reng a. Tharum thawhna tenau deuh pawgh a thleng zui deuh fo bawk.