Israel-in Gaza-a ei tur phurh luh a phal dawn ta
Israel chuan chawlhkar 10 zet a dan hnuah Gaza-a ‘tamna nasa tak thleng tur’ a awm loh nan ‘ei tur mamawh zualpui’ phurh luhna a hawng dawn ta tih a puang.
Prime minister pisa chuan Gaza Strip-a mite ei tur phurh luh hi Israeli Defense Forces (IDF) rawtna ang leh Hamas laka sipaiten nasa zawka beihpui an thlak tharah an mamawh vang niin tar lan a ni.
Gaza-a ei tur phurh luh tur puan a nih hma lawk hian Israeli sipaite chuan Gaza puma ‘lei lama zau taka beihpui thlakna na zawk’ chu an kalpui tan bawk.
Israel hian Gaza-a chengte mamawh lak luhna a dan chah rei tawh avang hian mi tam takin hawng turin an nawr a. Ei tur, tuialhthei leh damdawi engmah a luhtir phal lo va, hei hian tam a thlen mek.
Tanpuitu pawlte chuan Gaza-a cheng mi maktaduai 2.1 chu ei tur nei miah lovin an awm thei dawn nia sawiin thlalak leh video thehdarhah te chuan ei tur kham ei loh vanga naupang hmuh hrehawm tak takte pawh tihlan a ni.
French Foreign Minister Jean-Noel Barrot chuan Israel hi ‘rang takin, tam tham leh tihbuai lovin’ Gaza-ah puihna luhtir ngei turin a nawr.
Prime Minister Benjamin Netanyahu-a pisa chuan Israel-in Gaza-a ‘chengte mamawh khawp ei tur tam tawk tak’ phurh luh a ni dawn’ tih puangin, ‘tamna nasa zawk thleng thei thlentir a ni lo vang’ an ti a. Hamas laka beihpui na zawka an thlak mekna, Operation Gideon’s Chariot tanpuitu atan mamawh a ni bawk tih tar lan a ni.
Israel hian ‘Hamas-in mihring puihna thil sem an thunun theihna tur ang chi’ an phal dawn lo tih a sawi tel bawk.
Tar lan tawh thin angin October 7, 2023-a Hamas-in Israel chhim lam beia mi 1,200 chuang an thah leh Gaza-a hren tura mi 51 an hruai phuba lak nan Israeli sipaiten a beih letna chu Palestinian mipuiten an tuar na hle a. Kumin kum tira inkahhai an puan zawk hnuah pawt sei turin an inrem thei lo zui.
Hemi hnuah Israel hian bei thar lehin an mamamawh lak luhna zawng zawng chu March 18 atang khan a dang chat zui ta bawk a ni.
Israel-in Gaza-a ei tur phurh luh a phal dawn ta
