Israel-in Gaza-a puihna luhna a hawng dawn tih puang

Israel-in Gaza-a puihna luhna a hawng dawn tih puang
Tampui mitthi a tla mai dawn tia khawvelin a nawr hnuah Israel-a sipaite chuan Gaza Strip-a tanpuina phurh luhna tur an hawng dawn tih a puang ta.
Pathiannia thuchhuah an siamah Israel Defense Forces (IDF) chuan hmun thumah mihring inbuaipuina atan ‘sipai chetna an chawlhsan dawn’ tih an puang bawk.
A hma lawkin Israel hian thlawhna hmangin Gaza-ah hian ‘chhangphut, chini leh bura awm chi ei tur awmna thawh sarihin an thlak’ tih an puang bawk.
Israel hian mi maktaduai hnih vel awmna, Gaza-a tanpuina thil tlem chauh a luhtir phal avanga mi chengte nasa taka an tam avangin mi tam takin tam zawk luhtir turin an nawr a. Gaza-a ‘tam tla tih hi thu dik lo vawrh darh’ niin a sawi thin thung.
Palestinian thuneitute chuan tanpuina luhna hawn chungchang leh ei tur thlak chungchangah hian engmah sawi an la nei lo.
IDF hian puihna luhna hi UN leh pawl dangten Palestinian-te hnena ei tur leh damdawi an pek theih nan an hawng dawn tih a sawi a. Zing dar 06:00 atanga zan dar 11:00 thleng an hawng ang.
Sipai chetna chawlhsanna turte hi Al Mawasi, Deir al-Balah leh Gaza City niin chawhma dar 10:00 atanga zan dar 08:00 inkarah ni tin kalpui a ni dawn tih IDF chuan a puang.
UN leh tanpuitu pawl dangte chuan IDF thuchhuah hi engmah an la sawi zui lo va, a hmain Gaza-a miten ei tur an tlakchham thu leh puihna lut khuahkhirh chu phelh an duh thu erawh an sawi nasa hle.
Hamas hnuaia health ministry chuan tam vangin mi tam tak an thi tih an sawi a. Inrinni khan mi 125 thi an awm tawh thu leh heng zinga 85 hi naupan niin an sawi.
Inrinni zan atang khan Israeli sipaite chuan Gaza-a desalination plant-ah power an pek luh tan thu leh hei hi Gaza-a cheng mi 9,00,000-te hman a nih thu an sawi bawk.
Israel hian Gaza-a luhna hi March thla tir atanga kharin May atangin tlem a hawng.
US puihna nen puihna semtu thar, Gaza Humanitarian Foundation (GHF)-in puihna pek an buaipui a; mahse, puihna semna hmunah hian ni tin deuhthaw Palestinian thahna a thleng.
Israel hian October 7, 2023-a Hamas-in an ram beia mi 1,200 chuang an thah leh mi 251 an hruai phuba lain Gaza hi an bei tan a. Mi 59,000 chuang thi an awm tawh niin Hamas health ministry chuan a sawi.