Israel-in Gaza-ah damdawia mi tanpuitu pawl awm phal lo

Israel-in Gaza-ah damdawia mi tanpuitu pawl awm phal lo
Israel chuan damdawi inenkawlna thila mi tanpuitu pawl, Médecins Sans Frontières (MSF)-in Gaza-a an hnuaia thawkte hming a pek duh loh avangin hna an thawh an phalsak tawh lo.
Israeli sorkar hian Gaza-a tual chhung leh khawvel huap pawl 37-te chu an lehkha pawimawh thehlut vek turin an ti a, MSF hi hel pawl, Hamas leh Islamic Jihad nena inzawmna neiah an puh a, anni erawh chuan an pha nasa hle.
MSF hian Zirtawpni khan an hnuaia thawk Palestinian leh ram dang mite chu ‘an himna tur ngaihtuah avangin’ Israeli thuneitute hnenah an pe thei lo tih a puang.
Hemi chhan let nan hian Israel chuan Gaza-a MSF ‘chet velna chu tihtawp vek’ a ni tih an sawi ta a ni.
Israeli Ministry of Diaspora Affairs & Combating Antisemitism chuan ‘MSF hian Gaza-a mi tanpuitu pawlten an tih ngai ang, tual chhung mi an hnathawkte list an thehluh lo’ tih an sawi.
December 30 khan Israel hian khawvel huapa sorkar hnuai ni lo pawl, Gaza leh West Bank-a thawkte chu an hna thawh phalna (licence) an tihtawpsak a, thawk thei tura inziak lut tura tulte an ti lo niin an sawi.
Diaspora ministry chuan ‘mi dang tanpuitu hi firfiak luh rukna remchanga an hman thin’ venna atana tih a ni tih an sawi.
MSF, ActionAid leh Norwegian Refugee Council telin pawl eng emaw zat chu ni 60 chhunga an hmalakna titawp turin an ti a ni.
UK, France leh Canada telin ram 10-in Israel thutlukna hi an dem thu sawiin ni tin mamawh chet lakna an a buai dawn tih an sawi.
UN hnuaia Palestinian refugee agency Unrwa-a Gaza bik buaipuitu director, Sam Rose-a chuan MSF hian an staff-te hi thehluh theih loh chhan an nei niin an sawi a, ‘kum hnih liam ta chhunga damdawi thiam pawl leh khawvel huap tanpuitu pawl dang thawktu thatte hming list erawh an pe’ tih a sawi.
Indo chhung khan damdawia thawk mi 1,700 chuang thah awmin heng zinga 15 hi MSF an ni tih tanpuitu pawl chuan a sawi.
MSF hian Gaza-a damdawi in khum awm 20% vel thawh mekin health centre 20 vel a nei a. Nikum khan mi damdawi thila an enkawl 8,00,000 chuang leh nau chhar 10,000 chuang an nei a, tui thianghlim in tur an pe thin bawk.
Gaza-a indona khan Hamas-in October 7, 2023-a Israel chhim lam beia mi 1,200 chuang thata hren tura mi 251 an hruai atanga intan a ni.
Israel-in phuba lak nan Gaza hi bei zuiin mi 71,660 vel an thi hman niin Hamas health ministry chuan a sawi a. October 10-a inkahhai an puan hnuah pawh Palestinian 509 vel thah leh ni tawhin Israeli sipai pali thah an ni ve tawh bawk.