Israel-in Gaza bei zel, ‘hlawk takin’ US leh Netanyahu inbia

Israel-in Gaza bei zel, ‘hlawk takin’
US leh Netanyahu inbia
Israel-in Gaza Strip a beih chhunzawm mek karah US palai, Steve Witkoff-a chuan a thawhpui, Jared Kushner-a nen Israeli Prime Minister Benjamin Netanyahu-a an bia a, inkawmna ‘hlawk tak’ an nei niin a sawi.
Witkoff-a hian Pathiannia thuchhuah tawi te a siamah ‘President Trump-a 20-Point Plan for Gaza thawh hnihna a taka kalpui turin’ inkawmna hlawk tak an nei niin a tar lang a, US leh Israel chuan a tihlawhtling turin a inkawpin hma lam an pan tih a sawi.
Witkoff-a hian Inrinnia an inbiaknaah hian ‘an chhehvel thil dang pawh zau zawkin’ an sawiho tih a sawi a, heng zingah hian US leh Iran inkar leh Washington leh Tel Aviv tang dunin June thlaa ni 12 chhung Iran an beiha thil thleng te pawh a tel.
Hetih lai hian Israel chuan inkahhai puang mek chungin Gaza a bei zui reng a, October 10-a US rawtna anga inkahhai a awm hnuah ni tin deuhthaw bawhchhiatna a thleng.
Pathianniah pawh khan Israeli sipai leh laipui puak ri chu Gaza Strip khawchhak lamah chuan a chawl mang lo nia sawi a ni a. Gaza City-a al-Shifa Hospital chuan mi pakhat thiin mi dang 15-in hliam an tuar bawk niin an sawi.
Hmar lamah Jabalia refugee camp-ah damdawi in chu drone hmanga beih a ni a, hei hi Israeli leh Palestinian awmna inthenna, yellow line an tih bul lawka awm a ni a. Israeli sipai lirtheiten Jabalia khawchhakah silai nasa takin an hmet puak a, a bul vel khuaah laipui an kap nasa hle bawk.
October 11 hnu atang khan Israeli-te beihna avangin Palestinian 484 vel thi leh 1,321 hliam an awm tawh niin Gaza-a Palestinian health ministry chuan a sawi a. October 7, 2023 atanga Israel-in a beih atangin mi 71,657 an thi a, mi 1,71,399-in hliam an tuar tawh bawk.
Israeli-ten Gaza an beih mek lai hian Egypt nena an inkalpawhna, Rafah border crossing chu hawn a ni hnai niin Gaza-a technocratic committee hotu, Ali Shaath-a chuan Ningani khan Davos, Switzerland-a World Economic Forum-ah a sawi.
Rafah hawn hi US President Donald Trump-a 20-point plan-a langsar tak niin Gaza-a mite awlsam taka an luh leh chhuah theih chu a duh dan a ni.