Israel-in Gaza City beih chhunzawm, mi 31 an thi leh

Israel-in Gaza City beih chhunzawm, mi 31 an thi leh
Israeli sipaite chuan Pathianni khan Gaza City-a mihring chenna hmun bei lehin Palestinian 31 vel an thi a, mi tam tak tlanchhia an awm leh phah niin Gazan damdawi in thuneitute chuan an sawi a. Israeli tank-te chu mihring bitnaah an lut mek zel bawk.
Kum hnih dawn indona kal mekah Israel chuan Gaza City hi Hamas hmunpui awm chhun ni tawha sawiin inte an tanhmunah chhalin a tichhe mek.
Pathiannia thi zingah hian nu nau pai lai leh a fate pahnih an thi tel niin damdawi in chuan a sawi a. Israeli sipaite erawh chuan engmah an sawi lo va, he; ‘thahnem tak’ an thi tih chauh an sawi.
Israel hian Inrinni khan an sipaiten ni 30 liam ta chhungin Gaza City-a an beihpui thlakna an zauh zel tih sawiin hel 30 thatin an hmanrua an laksak tih an sawi bawk.
Thil thleng hmutute chuan Pathianni khan Israeli tank-te hian khawthlang lam atang leh chhimchhak daia Tel Al-Hawa atangin khawpui an lut tih an sawi.
Israeli sipaite chuan September thla tir atang khan khawpui hi mi 4,50,000 velin an chhuahsan tawh niin an sawi a. Hamas erawh chuan 3,00,000 vel chhuak tawhin 9,00,000 chuang an la awm tih an sawi ve thung.
Israel chhim lamah pawh Gaza-a helhovin rocket pahnih an kah avangin air raid siren tihrik a ni a, pakhat hi kah thlak niin pakhat hi tuma awm lohnaah a tla niin sipaiten an sawi a, thi an awm lo.
Israel-in Gaza City lak tuma a beihna hi ram dang tam takin an sawisel a, an thlawhpui khawthlang ram thenkhat pawhin tun kara UN General Assembly neih hmain Palestinian-te ramah an puang hlawm dawn.
British Prime Minister Keir Starmer-a pawhin a puan thuai rin a ni a. Britain-in ram anga a pawm a nih chuan Israel lam tang a nihna a sawn hret dawn tihna a ni.
Gaza City beih hian Hamas-in Gaza-a an la hren mekte nunna pawh a tiderthawng zel bawk a, an chhungte chuan ti tawh lo turin an duh a. Mi hren 48 la awmin tam tak erawh an thi tawha ngaih a ni.
Inrinni zan pawh khan Jerusalem-a Prime Minister Benjamin Netanyahu-a chenna bulah pun khawm a ni a, indo titawp tura inremna siam tur leh mi hrente chhuah turin an nawr.
October 7, 2023 khan Gaza-a Hamas hian Israel beiin mi 1,200 chuang thatin hren turin mi 251 an hruai bawk a, hei vang hian Israel chuan a bei zui a, Mi 65,000 chuang thi an awm tawh.