Israel Defence Minister chuan khawvel ram tena Gaza Stip beihnaa inkahhai an ngenna chu hnawlin tuna Hamas militant group an beihna chuan hun a la awh rei dawn tiin a sawi.
Yoav Gallant chuan thla hnih chhung indona kalpui tawha Gaza a tihchhiat tam lutuk tawh leh mihring nunna chan tam tawh lutuka sawiselna nasa tak karah an kalpui zel tur thu a sawi bawk a.
UN secretary-general leh Arab States te chuan inkahhai an rawt na tawh hle a. United States chuan Israel chu civilian nunna chan a tlem theih nana hma la tura tiin mahse diplomatic leh military support a pe tlat thung.
Israel hian October 7-a Hamas tena Israel chihm lam luta mi 1,200 chuang tihluma mi 240 an rukbo hnuah Hamas militant-te lakah indona a puang zui a ni.
Thla hnih chhung chu aistrike nen lei lama luhchhuahna nen kalpui tawhin hei vang hian Palestinians 17,000 chuangin nunna an chan tawh tiin Hamas-run territory a health officials te chuan an sawi a. Mahse, nunna chanah civilian leh Hamas sipai engzah nge awm tih erawh thliar hran a ni lo va, nunna chan zinga hmun thuma thena hmun hnih chu hmeichhia leh naupang an ni an ti thung a. Gaza Strip-a cheng 85% deuhthaw chuan an chenna in leh lo an chhuahsan tawh a ni.
Gallant chuan Israel hmalak zui zel dan tur engmah sawi a nei lo va, tuna an hmalak mekna chuan a kara kar a la duh dawn a, military activity hrim hrim chuan a thlaa thla a la duh ang tih erawh a sawi.
“Kan inveng dawn a, Israel hma lam hun atana chet la kan ni” tiin a sawi a. Gallant chuan indo an kalpui zel dan turah dodaltute beih bikna niin nasa lutuk lo a ni tawh ang a ti bawk.
Gallant thusawi lai hian Israeli forces te chuan southern city Khan Younis leh a chehhvel an bei mek a. Heng bakah hian Gaza City hmun thenkhat lai leh northern Gaza a Jabaliya refgee camp-ah te inbeihna a thleng bawk a ni.
Israel chuan Hamas-te chu thuneihna ata hnuh hniam a, an military theihna chhut chimih vek leh mitangte chhanchhuah chu tum berah a nei a ni. Hamas te hian mitang 117 an la kawl mek a, thla kalta khan mitang inthleng tawnnaah mitang 100 an chhuah tawh thung.
Central Gaza-ah chuan Israeli airstrike chuan residential building mi 80 awmna chu a deng chhe vek tiin sawi a ni a. Building-a cheng zingah mi paruk chauh an dam chhuak tiin sawi a ni bawk a.
Gallant thung chuan civilian te nunna chan tamna chhanah Hamas te chu dem thungin, Hamas te chuan school, kawtthler leh hospital te chu remchangah an hmang a, heng hmun pawimawh hi tunnel network siam nan bera an hman a ni a ti.
Israel chuan Hamas-te a chhu chhe nasa tawh a, Hamas group battalion commander zahve a tihlum tawh a, tunnel tam tak command centre leh weapon facility te tihchhiatin a awm tawh a ti bawk.
Israeli officials te chuan Hamas militant 7,000 vel zet tihhlumin an awm tawh tia sawiin thla kalta khan Gaza-ah Hamas militant 500 man an ni a ti bawk a. Israel chuan indonaah a sipai 104 a hloh tawh a ti bawk.
Gaza Strip hmar lamah chuan Hamas te chu chhut chimih thawhkhatin an awm tawh tibawkin southern Gaza-ah thung chuan ‘Sipai ang takin an la intel tha a ni’ tiin a sawi bawk.
Gallant chuan Israel chuan Hamas te computer atangin information terabytes za tel tehmeuh an hmuchhuak a ti bawk a.
Hamas te hian rocket hmangin Tel Aviv an la bei thei zel thung a, Thawhtanni pawh khan rocket-in an la kap thei a, Tel Aiv-ah hliam tuar an awm phah bawk.
Israel-in Hamas te a bei chhunzawm zel dawn
