Israel-in Hezbollah te bei zui

Israel sipaite chuan a ram awp Golan heights a football khel lai naupang te rocket hmanga an kah avanga naupang 12-in nunna an chan hnuah Lebanon-a inbun Hezbollah te chu a bei zui. Israel chuan kar kalta Inrinnia Majdal Shams a Druze khuaa football khel lai naupangte chu Hezbollah te kah tia sawiin mahse Hezbollah te chuan hei hi an hnawl thung.
IDF te chuan Lebanese territory thuk tka Hezbollah te hmunpui an beih thu sawiin hei vanga nunna chan leh hliam emaw engmah hriatzui theih a ni lo thung.
Nikum October thlaa Israel-Gaza indona chhuah hnuah Israel leh Hezbollah te chu an inkap chamchi bawk a, tuna buaina chhuak thar leh chuan indona lian zawk a hrin hlauhna a lian hle.
IDF te chuan Lebanon ram chhunga Hezbollah te hmun sarihah an bei tia sawiin chu chu kar kalta Inrinnia Hezbollah ten football pitch rocket hmanga an kah chhanletna tiin an sawi bawk.
Israeli Prime Minister Benjamin Netanyahu chuan phuba an lak tur thu a sawi hnu lawkah Israel chu a che zui nghal a ni.
Israeli Air Force te chuan Hezbollah te ralthuam dahkhawmna leh an infrastructure te an tihchhiat thu an sawi zui nghal a.
Hetih lai hian UN chuan thuchhuah siamin insumkarna nei tura ngenin buaina chuan helai region mai bakah a piahlam thlengin a nghawng thei tiin a sawi.
Hezbollah thupuangtu Mohamad Afif chuan Golan heights an beih loh thu sawiin Israel interceptor rocket-in football pitch chu a deng zawk tiin a sawi ve thung.
Druze-in beih a tawh hma hian Hezbollah te chuan hmun li laiah chet lakna an nei bawk.
IDF thupuangtu Daniel Hagari chuan Druze football pitch chu a hmunah tlawh nghalin Hezbollah te chu an thiltih ngei pawh pawm duh lova dawt sawiah a puh a ni.
Hezbollah te ralthuam hman chu Iran siam Falaq-1 a nih thu sawiin Hezbollah te ta liau liau a ni tiin a sawi a.
“Thil chiang tak mai chu Hezbollah te hian naupang pawisawi lo an that a ni,” tia sawiin Israel chuan phuba a lak zel tur thu a sawi bawk.
Israel leh Hezbollah te hian nikum October thla atang khan inkahna nei deuh reng mahse southern Lebanon border ah inbeihna zau zawk a chhuah duh lovin insumkarna an nei reng thung thin a ni.
US tlawha zin mek Israeli Prime Minister Benjamin Netanyahu chuan a zin titawiin Israel a panzui nghal bawk a.
Druze community leader Sheikh Mowafaq Tarif chuan tualthahna huaisar tak chuan pawi a sawi zo vek tawh tiin a sawi a.
Israel Foreign Minister Israel Katz chuan, “Indona kan hmachhawn mek a ni” tiin a sawi bawk.
Israeli President Isaac Herzog chuan ‘rapthlak’ tia sawiin ‘Israel ram chuan a khua leh tui leh sovereignty humhim turin chet a la dawn’ a ti bawk.
Lebanon sorkar pawhin thuchhuah siamin tharumthawhna leh civilian te beihna tin a dem thu sawiin ramri hnaiha inepna tin lak ata inthiarfihlim ni se a ti zui bawk a. “Civilian te beih hi international law bawhchhiatna leh principles of humanity kalh a ni” tiin Lebanon sorkar thuchhuah chuan a tarlang.
US leh EU te pawhin demna thu sawiin EN envoy Tor Wennesland chuan demnna thu a sawi bawkin insumkarna awm se a duhthu sawiin, “Middle East ah buaina nasa zawk a chhuak thei a, khawvel leh helai region hian indona a zo dawn lo” tiin a sawi.
Druze te hi northern Israel, Lebanon, Jordan leh Syria-a cheng an ni a. Israel-ah chuan khua leh tui dik tak te niin Israel mipui atanga chhuta 1.5% vel an ni.
Golan-a chengte chu Israel khua leh tui nihna pek niin kum 1981-a Israel-in Syria a chhuhsaka a awpzui kha niin mahse Druze thenkhatte chuan Israel awpna chu an pawm lo thung.
Golan-a Druze te hian Israel-ah lehkhazirin hna pawh an thawk thei a, mahse, khua leh tui nihna neite chauhin vote an nei thei thung.
Israeli Druze te chu army ah pawh tang ngei tur an ni bawk a, IDF a non-Jewish group lian ber an ni bawk.