U.S. Secretary of State Antony Blinken chuan Gaza-a inkahhai awm theih nan leh mitangte chhuah zalen a nih theih nana rawtna chu a pawm tia sawiin Hamas-te pawh pawm turin a ngen zui bawk.
Inkahhai a awm theih nan hian tun hnaiah diplomats te chuan theih tawp chhuahin inremna a awm a nih chuan Iran leh Lebanon a Hezbollah te chuan an top leader te thah an nihnaah phuba an lak theihna tizim dawna ngaih a ni a. Tun hnaia buaina nasa zual chuan indona zau zawk a chhuah hlauhna a tihlian hle bawk.
Blinken leh Israeli Prime Minister Benjamin Netanyahu te chuan darkar hnih leh a chanve lawih inbiakna neiin he mi hnu hian Blinken chuan Egypt leh Qatar a pan zui dawn a ni. US, Egypt leh Qatar te chuan Gaza-ah inkahhai a awm ngei theih nan theihtawp chhuahin hma an la zui zel a ni.
“Prime Minister Netanyahu nena inbiakna tha tak kan neihah Israel chuan inkahhai awm theih nana rawtna te a pawm thu min hrilh a ni” tiin Blinken chuan a sawi a, “Tuna pawimawh ber chu Hamas te pawhin an pawm ve theih chu a ni,” tiin a sawi zui bawk.
Hamas ten an pawm ve thei a nih chuan palaite chuan inremna kalpui a nih theih dan tur an bawhzui nghal ang a ti bawk a. Mahse, thil harsa tak tak la chinfel tur erawh a awm tia sawiin hruaitute chuan thutlukna siam harsa tak an siam ngei a ngai dawn tiin a sawi bawk thung.
Hamas te chuan a hmain palaia US chetdanah rinna an hloh tawh thu sawiin Americans te chu Israel tan zawkah puhin rawtna thar te pawh an hnawl tur thu an lo sawi tawh thung a. Blinken chuan rawtna an siamah Israel-in Gaza chhunga strategic corridor pahnih thunun a ngiatna chungchang chu a sawi lang lo va, Israel thil phut hi Hamas te chuan an hnawl nghal bur sa a ni thung.
Netanyahu pawhin Blinken nen inbiakna pawimawh leh tha tak an nei tiin a sawi bawk a. ‘United States chuan kan security interest mai bakah mitang te chhuah zalen an nih theihna tur a ngai pawimawh takzet a ni’ tiin a sawi a. Ceasfire deal thawhkhatna atangin mitang te chhuah zalen chu ngaih pawimawh berah an nei dawn tiin a sawi bawk.
Tun hi nikum October 7-a Gaza-a buaina chhuah hnua inremna a awm theih nana Blinken an Middle East a tlawh tum kua-na a ni tawh a, United States chuan inkahhai a awm theih beiseina sang tak a nei a.
Thawhtanni khan Blinken chuan tuna inkahhai awm theih nana a hmalakna chu pawimawh chung chuang tia sawiin mitangte chhuah an niha inkahhai a awm theih nana hun remchang hnuhnung ber a ni thei tihialin a sawi a ni.
Thawhlehni khan Blinken chuan Egypt leh Qatar a pan zui nghal a, heng hmunte hi Hamas tena political office an neihna niin inkahhai awm theih nan Hamas te a be zui dawn a ni.
Gaza indona hi nikum October 7 atanga intan kha niin Hamas te chuan Israel chhim lam lutin mi 1,200 chuang tihlumin mi 250 chuang mitang angin an hruai bawk a. Hamas tena mitang an hren zinga 110 vel zet chu la dam anga ngaih niin nikum November thla khan inkahhaina siamah mi 100 chu chhuah zalenin an lo awm tawh thung.
Israel-in Gaza a beih letnaah Palestinian 40,000 chuangin nunna an chan phah tawh tiin local authority te chuan an sawi a, Gaza-a hmun tam zawk chu tihchhiatin a awm tawh an ti bawk. Indona avangin mi maktaduai 2.3 vel zet te chu tam tuar tlukin an awm mek a, hri tha lo a len hlauhna a lian hle bawk.
Israel-in inkahhai rawtna pawm ti
