Israel-in Inrinni thleng a tiam, Gaza beih lehah a vau

Israel-in Inrinni thleng a tiam, Gaza beih lehah a vau
Israeli prime minister chuan Hamas-in ‘Inrinni chhun laia an mi hren an chhuah loh chuan’ Gaza-a inkahhai titawpin an inbei zui leh nghal dawn tih a sawi.
Benjamin Netanyahu-a hian Hamas-in thuleh awm hma chu an mi hren an chhuah tawh dawn lo tih an puan hnuah a sipaite chu Gaza chhunga awma inring turin a hriattir lehnghal a ni.
Netanyahu-a hian tuna mi hren mek 76-te chhuah vek turin a ti nge Inrinnia mi pathum chhuah tura tih lawkte chauh a sawina tih hriat a ni lo va, a minister pakhat erawh chuan ‘an vaiin’ tihna a nih thu a sawi.
Hamas chuan inkahhai inremnaah khan an ni chu an la awm reng a, Israel zawk hi ‘thil tikhawtlaitu’ niin an sawi.
An pawl hian Israel-in chawlhkar thum awh tur inkahhai hi an bawhchhia niin an sawi a, heng zingah hian puihna phur luttu tur an dan thu pawh an sawi a, Israel-in puhna hi a pha thung.
Hamas-in a mi hren chhuah hun tihkhawtlai a tum thu a puan hian US President Donald Trump-a chuan Israel chu inremna titawpa Inrinnia an chhuah lo a nih chuan nasa taka bei turin a a nawr nghal.
Thawhlehnia ni li chhung Israeli security cabinet an thutkhawm hnuah Netanyahu chuan video-a thuchhuah siamin ‘President Trump-a rawtna chu tha’ a tih thu a sawi.
“Hamas-in inkahhai bawhchhiaa an mi hren an chhuah dawn loh avang hian ni zan khan IDF (Israel Defense Forces) pawh Gaza Strip chhunga luta awm nghal turin ka ti nghal a ni,” a ti.
“Hamas hian Inrinni chhun laia an mi hren an chhuah lo a nih chuan inkahhai hi a tawp ang a, IDF-in Hamas hneh turin a tawp thlengin beih nghal an ni ang,” a ti.
Israeli chanchinbu, Haaretz-in an thu hriat pakhat an tar lanah chuan Inrinniah hian ruahman anga mi hren pathum chhuah an nih chuan inkahhai hi kaltlangpui an duh dawn bawk.
Mahse, hemi hnuah hian transport minister leh war cabinet member, Miri Regev chuan, “Thutlukna kan siam a: US President Donald Trump-a thuchhuah behchhan khan Inrinniah mi hren zawng zawng chhuah kan duh a ni,” tiin X-ah a tar lang.
IDF chuan Gaza-a beihpui thlaknaa mawhphurtu ber, Southern Command chu an inring leh vek tawh a, an sipaite inchah belhin reservist pawh an inrintir tih an sawi nghal.
Hamas hian Thawhlehni khan Trump-a’n US-in Gaza laka Palestinian maktaduai hnihte hmun danga sawn chhuaha din thar leha ‘Riviera of the Middle East’ din a tumna chu an duh loh thu a sawi.
Inkahhai kalpui mek thawh khatna hi chawlhkar ruk awh tur niin Israeli mi hren 33 chhuah tur niin Israel-in Palestinian lung in tang 1,900 chuang an chhuah dawn bawk.
Kanuary 19 atang khan mi hren la dam 16 chhuah an ni tawh a. Hamas hian Thai an hren panga an chhuah tawh bawk.
Mi dang chhuah leh tur 17 hi naupang pahnih, hmeichhe pakhat, mipa kum 50 chung lam panga leh kum 50 hnuai pakua an ni a, chawlhkar thum lo awm leh tur chhunga chhuah tura ruahman a ni a. Lehlam lehlam hian an zinga pariat chu an thi tawh tih an sawi a, pakhat erawh a hming an sawi lo.
Inremna ang chuan Gaza-a mihring chen tamna laia Israeli sipai awmte an chhuak ang a, Palestinian tlanchhiaten hmar lama an in an pan leh ang a, puihna thil tam tak phurh luh an ni bawk ang.
October 7, 2023-a Hamas-in Israel rûna mi 1,200 an thah bakah mi 251 hren tura an lak hnuah Israeli sipaite hian Hamas chhut chimih tumin an bei nghal.
Gaza-a Hamas an beihnaah hian mi 48,210 chuang an thi tawh niin Hamas enkawl health ministry chuan a sawi.
Gaza-a cheng tam zawk hi indona avangin vawi tam tak an tlanchhia a, in ding 70% dawn a chhe bawk a. Damdawi in, tui lakna, thli sawngbawlna zawng zawng a chhia a, ei tur, tuialhthei, damdawi leh awmna tur a vâng hle bawk.