Israel-in van sang atanga vawi hnih a zawna Lebanon chhim lama building pakhat an kahnaah emergency worker pathum telin mi pakua an thi niin Lebanese thuneituten an sawi a, an ram prime minister chuan ‘war crime’ tiin a sawi.
Lebanese health ministry chuan sorkar enkawl emergency service, Lebanon Civil Defense member pathumte hi Majdal Zoun khuaa beihna hmasaa hliam tuarte pui tura tirh an nih thu a sawi a. Vawi hnih kahnaah in chim karah tangin an thi tih finfiah zui a ni.
Ministry chuan thi dang parukte hi tute nge an sawi lo va. Pawikhawihna thlengah hian Lebanese sipai sipai pahnihin hliam an tuar bawk.
Israeli sipaite erawh chuan Lebanon chhim lam, Israel-in a awpna hmuna sipaite hnaih taka thawk, Hezbollah commander nia an sawi chu an bei niin an sawi ve thung.
Thil thleng hi chiang zawka en fiah mek a nih thu a sawi bawk a; mahse, a hmain damdawia thawk, chhanchhuah hna an thawh laia an beih dante chu an lo sawi fiah thei lo tawh a. An chet dan hi ‘double tap’ tia sawi niin an vawi khat beih hnuah an kap zui leh thin a, civil mi leh chhanchhuah hna thawktute an kap tel fo bawk a. Hetiang tih dan hi Israel hian Lebanon leh Gaza-ah a lo hmang tawh thin.
Mihring dikna chanvo humhalhtu oawlte chuan damdawia thawkte beih chu indona dan bawhchhiatna a nih theih thu an sawi.
Israel leh Iran-in sum leh pai leh ralthuam hmanga pui, Lebanon-a hel pawl leh political party ni bawk, Hezbollah inkara buaina chhuak leh mek hi March 2 atanga intan kha a ni a. He pawl hian Israel-ah rocket an kap a, Israel hian thlawhtheihna hmanga beihpui thlak leh Lebanon chhim lamah khawmuala beiin nasa takin an chhang let a ni.
Indona chhuah hnu hian Lebanon-ah hian mi 2,500 chuang an thi tawh a, heng zingah hian damdawia thawk mi 103 an tel niin Lebanese health ministry chuan a tar lang. Ral do mi leh civil mi an thliar hrang lo nain hmeichhia 270 vel leh naupang 170 chuang an tel tih a sawi.
Israel-ah Hezbollah-te beihna avangin civil mi pahnih an thi tawh a, Lebanon-ah Israeli sipai 16 leh civil mi pakhat an thi tawh niin Israeli thuneitute chuan an sawi ve bawk.
Nilainia a beihna hi US rawtna anga Israel leh Lebanon inkara inkahhai kalpui laia thleng a ni a, inkahhai vang hian inbeihna tlem deuh mah se a tawp vek thei lo.
Israel chuan Lebanon-a an thiltih hi Hezbollah-in inkahhai inremna an bawhchhiat chhanna a nih thu an sawi a. Hezbollah hian inremna siamnaah inrawlh ve lo mah se Israel-in inkahhai hi a zah chuan thuthlung an zawm ve tur thu a lo sawi tawh a ni.
Lebanese Prime Minister Nawaf Salam-a chuan chhanchhuaktute ‘beih’ chu Israel-in indona a tihsual a nih thu a sawi a, Israel-in inkahhai a bawhchhe chhunzawm chu a dem bawk.
Ramri atanga km 5-10 vel thleng, Lebanon ram 5% vel chu Israel-in a la awp a, Israeli thuneitute chuan an ram hmar lama chengte himna turin security buffer zone siam hi a tul niin an sawi.
Israel-in Lebanon-ah emergency worker pathum that
