Israeli sipaite chuan Hezbollah nen inkahhai an kalpui meka hun bi tiam a ral hma lawk, Thawhlehni khan Lebanon chhim lama Sindon-ah thlawhna atanga an kahnaah Palestinian hel pawl, Hamas commander an that tih an puang.
“Iran-in a kaihhruai leh puihnaa Lebanon ram atanga Israel khua leh tuite firfiak taka beihna ruahmantu, Mohammed Shahine chu dah that a ni,” tiin sipaite hian thu an chhuah.
“Shahine-a hi an pawl chhunga an hriatna hnar pawimawh tak a ni a, firfiaka Israeli civil mite beia rocket launcher hmanga kahnaa inrawlh leh ngaihtuahna sengtu ber a ni,” an ti bawk.
Israeli sipaite hian army checkpoint bul leh Sidon-a municipal sports stadium an kap tih news agency AP chuan a tar lang a. Thlalak darhah chuan car alh hluah hluah pawh a lang a. Lebanese sorkar news agency chuan chhanchhuah hna thawktuten ruang pakhat an la chhuak tih an sawi a; mahse, tunge a nih an sawi lo.
Drone hmanga beihna hi Israel leh Hezbollah ten inkahhai an puan mekah ni 60 a tiam tawp hun hma lawkah a ni a. Inkahhai hian thla 14 an indo tawhna titawp lailawkin Israel hian a sipai zawng zawngte chu Lebanon chhim lam atanga la chhuak tur an ni.
Inkahhai puan chhung pawhin Israel hian chhim leh khawchhak lama ‘sipai hmun’ an la kap chhunzawm reng a. Juda sorkar hian Hezbollah missile leh an ralthuam chauh an beih thu sawi mah se Lebanon erawh chuan inkahhai inremna bawhchhiatna a ni tih an sawi thung.
November khan US-in palai hna thawkin ni 60 chhungin Israel-in Lebanon chhim lama a sipai dahte la chhuak vek turin an inrem a. Hemi hun chhung hi February 18-a tawp kha ni mah se Israel hian Lebanon ram chhung hmun ngaah awm hmun an la khuar.
Inremna siam ang chuan Israel-in zawi zawia an chhuahsan hmunah UN peacekeeping force an lut zel thung a, Lebanese sipai an awm tel bawk ang a. Hezbollah pawh hian ramri atanga km 30 chuang, Litani River hmar lam thlenga tawlh kir an intiam a, chhim lama an sipai hmunte thiah vek an intiam bawk.
An inrem anga ni 60 chhung a liam tawh laiin Israel chuan pawh sei tumna a nei lo tih AP chuan a tar lang a. Hezbollah chief Naim Qassem chuan Israel chu inhnukdawk ngei turin Lebanese sorkar chu kar turin a ti.
Lebanese President Joseph Aoun pawhin inremna a awm theihna atana beitu, a bikin US chu Israel-in a sipai a lak chhuah theih nana nawr turin a ti ve bawk.
“Israel hian inremna siam zaha inremna ang ngeia thil a tih theihna turin kan biak theih ang ang kan be zel dawn a ni,” tiin Aoun-a chuan a sawi.
Israel-in Lebanon-ah Hamas commander that
