Israel-in Lebanon-ah Hezbollah sipai hotu lawk that
Israeli sipaite chuan inkahhai puang me mah se Lebanese khawpui, Beirut chhim lam daiah hel pawl, Hezbollah-a an hruaitu lawk tak chu thlawhna atanga an kahnaah an that tih an sawi.
Ali Tabtai-a hi Hezbollah chief of staff niin an pawla hruaitu hlun tak, chanvo sang pawimawh tak tak lo chelh tawh niin an sawi.
Lebanon-a health ministry chuan Pathiannia mihring cheng an bitna, Dahieh district-a mihring chenna in lian tak kah fuhnaah hian mi panga vel an thi a, mi 28 dangin hliam an tuar bawk niin an sawi.
Hezbollah pawhin an commander lawk tak a thih thu an sawi tawh a, tunge tih an sawi lo thung.
Tun hi thla tam tak hnua Israel-in Beirut chhim lam a kahna hmasa ber a ni.
Israel leh Shia Muslim pawl, Iran-in a thlawp, Hezbollah hi US leh France palainaa November thlaa inkahhai puang tawh ni mah se Tel Aviv hian an pawl nena inzawmte leh an hmunte hi tun hnaiah a vau leh tan.
Israeli thuneitute chuan Hezbollah hian an sipai pawl tun din leh an tum a, Lebanon-ah ralthuam tawlh lutin puak thei phur drone bakah rocket leh missile siam hna an thawk leh tan niin an sawi a, hei hian buaina lian zawk a thlen hlauhna a siam leh mek.
Lebanese President Joseph Aoun-a chuan ram dangte chu Lebanon chhim lam hmun nga la luah mektu Israel chu beihna leh an hmun luah chhuahsan tura nawr turin an ngen a, Israeli-te chet dan hian thla 13 indona chhuaka inremna an ziah a palzut niin a sawi.
Lebanese sorkar hian Hezbollah pawh an ralthuam dah turin a ti a; mahse, an pawl hian Israel-in a beih a tawpsak lohva Lebanon-a an awm zel leh Lebanese mi tang an chhuah hma chuan an awm zel dan tur an sawi thei rih lo.
Israel leh Hezbollah inkara buaina hi Lebanese pawl hian Hamas-in October 7, 2023-a Israel an beih hnuah rocket-a Israeli tanhmunte an kah atangin a ni a. Hezbollah hian Gaza-a Palestinian-te lam an tang tih entir nana che niin an insawi.
Lebanese thuneitute chuan Israel-in a beih letnaah mi 4,000 chuang an thi a, heng zinga tam tak hi civil mi niin an sawi a, mi maktaduai 1.2 chuang baihvaiin an awm phah niin an sawi bawk a. Israeli thuneitute pawhin an sipai 80 chuan leh civil mi 47 an thi niin an sawi ve bawk.
US sorkar chuan Tabtai-a hi kum 2016 khan hrekin mi firfiakah a puang a. A chin hrilh theite chu $ maktaduai 5 pek a tiam bawk.
US hian Hezbollah sipai hruaitu lawk, Syria leh Yemen-a an special force pawh lo kaihruai tawh niin an sawi.
Israel-in Lebanon-ah Hezbollah sipai hotu lawk that
