Israel-in Lebanon chhim lam khaw pathum kap leh

Israel-in Lebanon chhim lam khaw pathum kap leh
Israeli sipaite chuan nikum November atangin inkahhai puang mah se Lebanon chhim lama khawp athum vel – Mahrouna, Jbaa, leh al-Majadel te an kap.
Lebanon-a National News Agency chuan Jbaa hi Ningani khan kah niin mihring bitna laia in kah chhiat a ni a, a bul vel pawh a chhe nasa niin a tar lang.
al-Majadel hi Israeli sipai thupuangtu, Avichay Adraee-a’n insaseng tura a tih hnu darkar khat vel hnuah kah a ni bawk.
Adraee-a’n X-a thlalak a dah chhuahah al-Majadel leh Braashit map tar langin building an bitum pawh a tilang a, an hmun chhinchhiah atanga metre 300 chuang huam chhunga khawsate chu insaseng turin a ti a, heng hmun hi Hezbollah-in an hman niin a sawi.
Tun tuma beihna hi October, 2023 atanga Israel leh Hezbollah inkara inbeih chhuak, November, 2024-a inkahhai puan tak bawhchhiatna hnuhnung thar a ni.
Inkahhai kalpui a nih hnuah khan Israel hian ni tin deuhthaw Lebanon hmun hrang hrangah beihpui thlakin mi 300 chuang an that tawh a, an zinga 127 vel hi civi mi niin UN chuan a sawi.
Ram pahnihte hi kum tam tak hnua a vawi khat nan inremna nghet zawk a awm theih nan tun karah hmaichhana inbiak tum an ni a; mahse, a hnuah Lebanese Prime Minister Nawaf Salam-a chuan an inbe dawn lo tih a sawi leh.
Lebanese sipai hotute chuan November thla tawp thleng khan Israel-in vawi 5,198 zet inkahhai an bawhchhiatna an hriat tawh thu leh heng zinga 657 hi boruak atanga kahna a nih thu an sawi.
Israel erawh chuan beihpui an thlakah hian Hezbollah member leh indin thar leh tura an hmalakna atana an hman hmunte an tum thin niin an sawi.
Inkahhai inremna an siamah ram pahnihte hi indo lo turin an inrem a, Lebanon-in an rama hel pawl awmte chu Israel bei lo tura thununin Tel Aviv-in sipai chakna hmangin a bei lo bawk ang.
Hetih lai hian Israeli sipaite chuan Lebanese ram chhunga hmun ngaah tanhmun an la luah a, inremna zawm lovin an la insaseng duh lo.
November thla tawpa Israeli-ten Beirut-a Hezbollah commander hlun tak an thah khan boruak a titang thar a, hei hi thla tam tak hnua Lebanese khawpui an kahna hmasa ber a ni.
Inepna hi October 8, 2023-a Hezbollah-in Gaza-a Palestinian-te lam an tang tih lantir nana Israeli-te luah, Golan Heights-a Israeli sipai tanhmun an kah atanga intan kha a ni.
Hemi hnuah hian Lebanon-ah mi 4,000 chuang thah tawh an ni a, a tam zawk hi September leh November, 2024-a an indo chhunga mi niin mi maktaduai 1.2 chuang baihvaiin an awm phah.
Lebanese sorkar hi Washington chuan Hezbollah-te ralthuam lek thei lo tura ti turin a nawr reng bawk a, hei hi indo tihtawpna tur nia an ngaih a ni a, hel pawl hian ralthuam dah an duh lo thung.