Israeli Prime Minister Benjamin Netanyahu chuan khawvel ram hrang hrang ten an ngenna ngai pawimawh duh lovin a sipai te chuan Agzan city Rafah chu an beihchhunzawm dawn tiin a sawi.
French President Emmanuel Macron chuan Netanyahu hnenah Israel in Gaza operation a neih avanga mihring te tawrhna chu a nasa lutuk tawh tiin a sawi a. Mahse, Netanyahu chuan a sipaite chu lei lam atanga Rafah bei chhunzawm turin thupek a pe thung.
Rafah khawpuiah hian Palestinian 1.4 million vel chengin Israel chuan vansang lam atangin a bei fe tawh bawk a.
Netanyahu chuan indona chu an la chhunzawm zel dawn tia sawiin Gaza thununtu Hamas te chu southern city Rafah atangin umchhuah vek an ni dawn tiin a sawi a.
“Hnehna famkim kan chan hma chuan kan bei chhunzawm zel dawn a, Rafah khawpuia civilian te chuan khawpui an chhuahsan kan remti dawn,” tiin a sawi.
France President Macron chuan phone a Netanyahu bia-in Israel chuan Gaza a beih chu chawl lai lawk se a duh thu a hrilh a. France chuan Israel-in Rafah a bei chu an duh lo tia sawiin a chhan ber pawh humanitarian disaster a turu lutuk a ni, a ti.
Australia, Canada leh New Zealand prime minister te pawhin thuchhuah intawm siamin Rafah a Israel military operation chuan chhiatna a thlen nasat an hlauh thu an sawi bawk a.
“Israel sorkar hian bei chhunzawm lo se kan duh a ni. Military operation neih avanga Palestinian civilian te tawrhna leh nghawng a turu lutuk dawn,” tiin an sawi.
German Foreign Minister Annalena Baerbock, Israel tlawha zin mek pawhin Rafah a cheng mipui te chuan kalsawnna tur chuang an nei tawh lo va, boruakah an thamral ringawt mai thei hek lo tiin a sawi bawk.
Spain leh Republic of Ireland te pawhin member an nihna EU hnenah ngenna siamin Israel chuan Gaza a beihnaah human rights humhim tura mawhphurhna a neih a tihlawhtling em tih enfiah turin ngenna an siam bawk.
Hamas te enkawl Palestinian territory a health ministry te chuan Gaza a Israel chetna avangin nunna chan 28,576 an tling tawh tiin an sawi bawk a. Israel hian Gaza a beih chhan chu nikum October 7-a Hamas tena Israel bei tura mi 1,200 chuang tihluma mi 253 an rukbo zui vang a ni.
Indona thlen tirah Israel chuan Gaza a beih tak tak hmain Gaza-a chengte chu Rafah lamah tlanchhe turin a lo ti tawh a. Tunah chuan Israel thuneitute chuan civilian te chu Mediterranean coastal-Mawasi a agrilcultural land zimteah humanitarian zone tia a sawi pankhawm turin a ti leh tawh thung a ni.
Netanyahu chuan US, Israel, Egypt leh Qatar te nena inbiakna neia remna a awm theih nana hmalakna neihin awmzia a neih theih takloh hnuah Rafah beihchhunzawm zel tur a nih thu hi a puang a.
Israel prime ministerial office chuan Hamas te chuan mitang te chhuah an nih theih nan rawtna thar lam a nei lo tiin chu mai bakah Hamas te ngiat turu tak chu an tihlawhtling dawn hauh lo a ti bawk a. “Hamas tena an tanna an thlak hma chuan inremna a awm thei lo,” tiin tarlan a ni.
Hei vang hian Gaza buaina chuan reh lam a pan mai rin a ni lo va, Israel chuan a sawi lawk sa ang ngeiin Rafah khawpui pawh a beih chhunzawm ta zel a ni.
Israel-in Rafah bei zel
