Israel Defense Forces (IDF) te chuan Rafah-ah Israeli tang Hamas tena an rukbo pahnih an chhanchhuah thu an sawi a. Israel chuan souuthern Gaza city hi air strike hmangin a bei zui bawk.
IDF te chuan mitang an chhanchhuah te chu an hriselna a that thu sawiin medical test nei turin Israeli hospital an panpui nghal thu an sawi bawk a.
Hetihlai hian Palestine Red Crescent Society te chuan Rafah khawpui chuan beih a tawk mek tia sawiin nunna chan tam tak an awm tawh an ti bawk. Israel chuan southern Gaza chu a beih ngei thu sawiin mahse kimchangin engmah sawilan a nei lo thung a.
Thuchhuah an siamah IDF te chuan “IDF, ISA (Israel Security Agency or Shin Bet)”, Israel Police te chuan joint operation an neihnaah Kibbutz Nir Yitzhak atangin mitang pahnih Fernando Simon Marman (60) leh Louis Har (70) te an chhanchhuak tiin an tarlang a ni.
IDF te chuan zana a hmun sawi lan chian loha helicopter tum lai an tichhuak bawk a. He helicopter hi mitang te Israeli hospital panpui nana an hman a nih leh nihloh pawh a chiang chuang lo.
Defence Minister Yoav Gallant chuan rescue operation an neih chu ‘turu tak’ tia sawiin, “Kan intiamna ang ngeiin mitang te engti kawng pawha hruai haw kan tum a ni” tiin a sawi.
Israeli media te chuan mitang te chu Rafah a building pakhata chhawng hnihnaah an dah tiin an sawi bawk.
Israel hian 7 October, 2023 a Hamas silai keng tena southern Israel runa mi 1,200 chuang an tihhlum hnuah Gaza Strip a run a ni. Hamas te hian Israeli mitang 240 vel an la bawk a, heng zinga a thenkhte chu chhuah zalen erawh an ni tawh thung a, Hamas lung in tang te nena inthleng an ni.
Rafah khawpuiin beih a tawk loh nan hian khawvel ram hrang hrang te chuan Israel hnenah ngenna an lo siam tawh a, mahse, chung te chu Israel chuan a ngai pawimawh duh chuang lo. Rafah beihnaah hian palestinian 52 in nunna an chan niin Gaza a Hamas te enkawl health ministry chuan a sawi a ni.
Pathianni pawh khan Hamas te enkawl health ministry chuan a hma niin Israel thathawh avangin Palestinian 112 in nunna an chan belh tiin a sawi bawk a, indona chhuah hnuah nunna chan 28,100 chuang awm tawhin hliam tuar 67,500 an awm tawh tiin tarlan a ni bawk.
UN humanitarian official te chuan Gaza ah hmun him a awm tawh lo tiin an sawi bawk a. Rafah hi Egypt nena inrina bula awm niin Gaza a humanitarian aid luhna inhawng awmchhun a ni bawk.
Pathianni khan US President Joe Biden chuan Israeli Prime Minister Benjamin Netanyahu chu bia in Rafah beihna chu civilian te himna ngaihtuah chung lo chuan kalpui tur a ni lo tiin a hrilh a. Biden chuan Israel chuan ruahmanna tha leh rintlak a neih a ngai a, Rafah khawpuia civilian te himna a ngaihtuah tur a ni a ti.
UK Foreign Secretary David Cameron pawhin Gaza a mihring zahve lawih te chu Rafah ah an cheng mek a ti bawk a. Saudi Arabia chuan Rafah in beih a tawk a nih chuan a sawhkhawk natak a awm ang a ti thung.
Mahse Netanyahu chuan Rafah beihna chu an kalpui tlang dawn tho tiin a sawi lawk thung ang bawkin kalpui a ni zui ta a ni.
Israel chuan Rafah khawpuiah hian Hamas hruaitu lawk te chu la biru ang leh Hamas fighter batallion li lai an la inkulh niin a sawi a. A tum ber chu Hamas te nuaichimih a ni bawk.
Israel in Rafah bei zui ta
