Israel chuan Palestinian sang tam tak te chu Rafah chhuahsan turin a ti leh a, nasa zawkin southern Gaza a beihna chu kalpui a tum a ni.
Vansang atangin flyers leh social media post te hmangin Rafah khawchhak lam district a cheng te chu al-Mawasi, coastal area a hmun zimte Israel-in ‘humanitarian zone’ tia a siamah chuan kalkhawm turin a ti a ni.
Rafah-ah pawh khawchhak lam hmun lun em em thin chu tunah chuan rauhsan khua ang maiin a reh thuap tawh a ni.
Israel chuan US leh a thawhpui ram dang ten ti lo tura an nawr chungin Rafah luhchuah chu a tum thu a sawi nawn leh ngat bawk a. US chuan Rafah luhchuah a nih chuan civilian nunna chan an tam lutuk dawna humanitarian crisis a awm a hlauh avangin Israel chu ti lo turin a ngen a ni.
Kar kalta Inrinni khan US President Joe Biden chuan Hamas tena Israel mitang an chhuah zalen phawt chuan an chhuah tuk lawkah inkahhaina a awm nghal ang tiin a sawi a.
“Israel chuan Hamas te kutah thil a awm tawh a ti a, an ti duh a nih chuan naktukah pawh kan titawp thei a, naktuk atangin inkahhai a awm thei a ni,” tiin Biden chuan Seattle a fund-raising event neihnaah a sawi.
Israel chuan Hamas ten mitang 128 an la kawl angah ngaiin heng zinga 36 te chu thi tawh anga ngaih an ni thung.
Kar kalta Inrinni pawh khan Israel chuan Rafah a Hamas te hmun nia a sawi chu indo thlawhna hmangin a bei tawh bawk a. Israel Defense Forces (IDF) te chuan tun hnaiah Hamas fighter te nen Rafah-ah inbeihna an hmachhawn tiin a sawi bawk.
Tun hnaiah Israel chuan Gaza Strip hmun hrang hrangah air strike a kalpui chamchi a, heng hmunte hi Hamas te hmun leh an infrastructure te tiin a sawi.
Kar kalta Inrinni khan IDF te chuan Gaza Strip hmar tawp lama Jabaliya area-a Hamas te hmun pawimawh an beih thu an sawi bawk a. Northern Gaza-a chengte chu Israel chuan a beih dawn avangin western Gaza City a insaseng rih turin a lo ti tawh a ni.
Hetih lai hian Hamas te pawhin north Gaza border atanga 10 km leka hla Ashkelon chu rocket hmangin an kap bawk a, Times of Israel chuan Hamas te rocket vang hian mi pathumin hliam an tuar tiin a sawi.
Israel-in Gaza Strip chhim lam Palestinian sang tam tak te sahimna zawnga an awmkhawm mekna chu luhchhuah a tum thu a sawi avangin khawvel ram hrang hrang ten ti lo turin an nawr nasa hle a.
Kar kalta khan President Biden chuan Israel-in Rafah a bei lui a nih chuan US chuan Israel hnena ralthuam pawimawh a pekte a pe tawh dawn lo a ti tawh a.
Mahse CNN ten an kawmnaah Biden chuan America chuan Israel chu a invenhimna tur ralthuam te chu a la pe chhunzawm zel dawn a ti thung a, chung zingah chuan Iron Dome air defence system atana interceptor te pawh a tel a.
Mahse Biden chuan US pek heavy weapons te chu Gaza a civilian te tihlum nana hman a ni tia sawiin Rafah a beilui a nih chuan Washington chuan ralthuam pawimawh a pe zui rih dawn lo a ti thung.
UK Foreign Secretary David Cameron chuan Britain chuan Rafah luhchhuah a thlawp lo a ti bawk a, mahse, America angin Israel hnena ralthuam a leitir thulh a tum chuang lo.
Karkalta Zirtawp khan Israeli Prime Minister Benjamin netanyahu chuan Biden nena ngaihdan inang lo an neih chu an chinfel theih a rin thu a sawi a, mahse, Rafah luhchhuah chu an kalpui dawn tho a ti thung a.
“A tul a nih chuan keimahni chauh pawhin kan ding mai ang a. A tul a nih chuan kan kut tin nen chauh pawhin kan bei mai ang” tiin Netanyahu chuan a sawi.
Aid agencies te chuan Israel-in southern Gaza a luhchhuah a nih chuan Palestinians te chuan awmna tur hmunhim an nei tawh dawn miah lo an ti bawk a.
Charity Oxfam te chuan Gaza-ah damdawi in mumal a awm tawh lo va, tanpuina pawh mumal taka pek a ni lo an ti bawk a. Rafah a damdawi in pathum awm te pawh a bul hnai lawka inbeihna avangin rauhsanin a awm bawk.
UN’s agency for Palestinian refugees (UNRWA) te pawhin Israel-in Palestinian te kalkhawm tura a tihna hmun him al-Mawasi camp chu a dinhmun a chhiat thu an sawi bawk a. Facility mumal engmah a awm lo va, mipui te chu puan in inzawmin an awm tawp mai a ni tiin an sawi a.
“Tui thianghlim a mumal lo va, infrastructure a awm lo va, tuichhe paihna leh sanitation mumal a awm lo” tiin Sam Rose, UNRWA chuan a sawi.
Israel-in Rafah khawpui run tum
