President Joe Biden chuan Prime Minister Benjamin Netanyahu hnenah Israel laka US policy chu Gaza civil mite humhim danah a inghat tiin a hrilh a.
President Biden thusawi hnu lawkah Netanayhu office chuan thuchhuah siam zui nghalin northern Gaza Strip-a tanpuina tam zawk a luh theih nan Ashdod leh Erez checkpoint te chu hawn lailawk a remtih thu a sawi nghal.
“|anpuina tam zawk thawnluh chuan humanitarian crisis thleng tur a veng dawn a, chu chu indona a thil tum tihhlawhtlina inbeihna kal zel tur atan a pawimawh a ni” tiin thuchhuah chuan a tarlang.
Biden leh Netanyahu te hi Thawhtannia World Central Kitchen group hnathawk pasarihin nunna an chan hnuah inbiakna an nei a. Biden chuan Gaza ah inkahhai siam nghal ni se tiin civil mite tawrhna chu pawm theihloh tiin a sawi bawk.
Democrat Biden chuan tun hnaiah Israel-in Gaza-a indona a kalpui a thlawp avangin nawrna leh sawiselna nasa tak a tawk mek a. Israel hnena military aid dollar billion tel pek a tum chu pe lo tura nawrna a tawng nasa hle a ni.
Biden chuan ‘Chiang takin Israel chuan civil mite tawrhna awm lo thei ang berin leh tanpui hnathawktute himna tur a ngaihtuah tur a ni’ tia sawiin, “Gaza chungchanga US policy chu Israel-in civil mite himna a ngaihtuah danah a innghat ang” tiin a sawi thu White House thuchhuak chuan a tarlang.
Biden chuan nikum October 7 atanga Gaza indonaah Israel chu a thlawp tlat a, mahse, tun hnaiah civilian nunna chan tam lutuk leh Gaza a humanitarian condition chhe lutuk avangin a lawm lohna a sawi lang fo tawh thung.
A bik takin Thawhtannia aid worker pasarih lai Israel in a tihhlum chuan Biden chu a tilawm lo zual hle a ni. Israel thung chuan aid worker te tihhlum chu tihpalh takzet tiin an sawi ve thung.
Chutihrual chuan Biden administration chuan tun hnaiah lawk pawh Israel hnenah bomb sang tel tak meuh meuh a thawnlut leh zui a ni.
Israel-in tanpuina luh remti dawn
