Israel-in thah a tumnaah Iranian president hliam
Iranian President Masoud Pezeshkian-a chu June 16 khan Israeli thlawhnain a beihnaah hliam tenau a tuar niin Iranian Revolutionary Guard Corps (IRGC) hnuaia Fars News Agency chuan Pathianni khan a tar lang.
Pezeshkian-a hi Israeli missile-in Tehran khawthlang lama Supreme National Security Council thutkhawmna hmun a fuhah a ke a hliam nia sawi a ni.
President Pezeshkian-a bakah hian Parliament Speaker Mohammad Bagher Ghalibaf, Judiciary chief Mohseni Ejei leh hotu pawimawhte he thutkhawmah hian an tel niin tar lan a ni.
Israeli-ten beihpui an thlakna hi Beirut-a Hezbollah hruaitu, Hassan Nasrallah an thah dan ang bawk kha nia sawi a ni a. Missile paruk hmanga in hi kah fuh niin a luh leh chhuahna an kap chhia a, hei hi tlanchhiatna tur dan nan leh boruak lut leh chhuak a that theih loh nana tih a ni.
In chhawng hnuai lamah hian Iranian thuneitu dangte pawh an awm a. Na taka a puah hnuah power a awm lo zui a; mahse, emergency hatch ruahman a ni a, hemi hmang hian himin an chhuak thei niin Fars chuan a tar lang.
Pezeshkian-a bakah mi dangte pawhin an chhuahna lamah hian hliam tenau an tuar a. Iranian thuneitute hian a hun leh hmun dik taka beihna a thlen avang hian tu emaw hre ru an awm a nih ringin an chhui zui mek.
Iranian President Pezeshkian-a hian a hmain Israel-in thah a tum tih a lo sawi tawh a. “An tum a, ruahmanna pawh an nei a; mahse, an hlawhchham,” tiin Tucker Carlson-a’n a kawmnaah a sawi.
Iran International chuan Israel hian June 16 khan Tehran khawthlang lama Shahrak-e Gharb vel chu an bei ngei tih an tar lang.
Ni 12 an indo chhung khan Israeli sipaite hian Iranian sipai hotu lawk leh nuclear scientist eng emaw zat an that hman a. Heng zingah hian IRCG commander Hossein Salami, Iranian Armed Forces Chief Mohammad Bagheri, IRGC air force commander Amir Ali Hajizadeh leh IRGC air force thuneitu dangte pawh an tel.
An indo chhung khan Israel hian Iran-a an hruaitu lawk ber, Ayatollah Ali Khamenei-a pawh thah an tum tih thawm a awm bawk a ni.
Israel-in thah a tumnaah Iranian president hliam
