Israel leh Iran an inbei zui zel

Israel leh Iran an inbei zui zel
Israel leh Iran ramte chu missile hmangin Inrinni zanah pawh khan an la inbei chhunzawm zel a, zau zawka buaina a hrin chhuah hlauhna a lian hle.
Israel hian Zirtawpni khan a hmelma kumhlun hi a bei thut a, khawvela borualalhthei lak chhuahna hmun lian ber pawh a kap tel.
Pathianni tukah khan Israeli sipaite chuan Tehran-a Iranian defence ministry headquarters an kah fuh thu an sawi a. An khawpui chhungah hian hmun pawimawh tak tak, ‘Iranian lalramin nuclear weapon project a neih kaihhnawihte’ nena inzawm hmunte an kap fuh nasa niin an sawi.
Israeli sipaite chuan Iran-in nuclear ralthuam neih a tumna kawnga an hmun pawimawhte an kap hlawm niin an sawi a. Hetih lai hian US intelligence agency leh International Atomic Energy Agency (IAEA) erawh chuan Tehran hian nuclear ralthuam siam a tum ngei tih an sawi ngam lo.
Hetih lai hian US President Donald Trump-a chuan Tehran chu a Truth Social kaltlanga vauin, “Iran hian eng ang kawng pawhin min bei sela US Armed Forces chu tun hmaa kan la hmuh ngai loh khawpa nasain an thawk chhuak ang,” a ti a. “Iran leh Israel inkar hi chin fel thuai theiha thisen luanna hi tihtawp a ngai,” a ti bawk.
Trump-a hian an inremna tura rawtna a neih erawh engmah a sawi lo thung.
Inrinni zana Iranian-ten Israel an kahnaa naupang telin mi pariat vel an thi a, Israel-ah hian hmun zau takah air raid siren tihrik niin mi maktaduai tel chu inhumhimna hmun siamah an tawm niin AFP chuan a tar lang.
Ram lailia rocket tlain naupang kum 10 mi telin mi pali vel an thi a, mi 100 velin hliam an tuar bawk niin Magen David Adom (MDA) thupuangtuin a sawi.
Iran hian Pathianni khawvar hma pawh khan missile-in a kah chhunzawm a, ni thum nan ram pahnihte hi an inbei nasa hle zel.
Iranian sorkar television chuan Pathianni zing dar 03:10 (India-a zing dar 06:10) velah khan, “Operation Honest Promise 3 chu minute rei lo te kaltaah khan tan a ni,” tiin Israel atanga video lak a tichhuak.
Iran-a an sipai tha bik, Revolutionary Guards chuan he beihnaah hian Israeli indo thlawhnaten an tui leh an mamawh an lamna hmun an kap niin a sawi a. Iran beih chhunzawm a nih chuan na leh khawng zawkin an sipaite an che dawn tiin a sawi bawk.
Israel nena indona a chhuah mek avangin Iran chuan nuclear chungchanga US nen Oman-a inbiak an tum chu a thulh rih tih a puang a. US chuan he inbiakna hmang hian an indona chu hmeh daih theih a inbeisei hle a; mahse, Iranian Foreign Minister Abbas Araqchi chuan hetiang boruakah chuan an kaltlangpui thei rih lo tih a sawi.
Hetih lai hian Israeli Prime Minister Benjamin Netanyahu-a chuan Iran vau zuiin tuna an hmuh tawh chin chu a zuitu tur hmahruai chauh a nih thu leh an beihna chhan letna chu na zawkin an kalpui dawn tih a sawi.
Israeli sipaite hian Inrinni zana Iranian missile kah chhuahte chu an lo dangchat hlawm niin an sawi a. Jerusalem-a chengte chuan vanah thil thlawk an hmuh nasat thu an sawi a, air raid siren erawh tihrik a ni lo tih an sawi a. Hmar lama Haifa-ah erawh tihruk a ni.
Iran chuan Tehran-a Shahran oil depot chu Israel-in a kah fuh thu leh an khawpui bula tuialhthei thlitfimna a kang nasa niin a sawi a. Tasnim news agency chuan defence ministry kah fuh erawhin chhiatna tenau chauh a thlen niin a tar lang.