Familia Fanai Lal\ansanga
Israeli Prime Minister Benjamin Netanyahu chuan Hamas ho a vau nawn leh a, “He indona chawkchhuaktu hi Israel a ni lo va, mah se a hnukhartu, a hmawrbawktu chi Israel hi a ni dawn chiang a ni,” a ti.
Hamas sipaiho laka phuba lak nan Israel sawrkar chuan sipai 3,00,000 a inpuahchahtir mek a, reservist 4,00,000 lai a la bawk a, Kum 1973 Yom Kippur indona hnu lama Israel sawrkarin reservist a lak hnem ber tum a ni hial a. Israel ramah chuan mi tin mai hi sipai nunchan zir thiam vek a ngai a, civil mi, rikrum thila sipaia tang mai thei turte hi Reserve service an ti a. Chutianga mi chu reservist an ti a ni. Tichuan, a si ruk lain sapui chetin Israel hi a che dawn a, an sipaite an inbuatsaih ta mup mup mai a ni.
Benjamin Netanya chu chuan, “Hei hi indona a ni a, he indona hi kan chawhchhuah a ni lo. Rawng tak leh rapthlak takin min bei a, thung rul lo thei thei kan ni lo. Indona chawkchhuaktu kan ni lo va, a hmawrbawktu tur zawk kan ni a, hnehna hlado kan chham ngei dawn a ni,” a ti.
October ni 7 tûk atanga Hamas-in Israel an run thut avangin Israel mi 700 aia tam mahin nunna an chan tawh a, mi 2,300 laiin hliam an tuar bawk a ni.
“Hamas hian mi rûn a, a sawhkhawk leh a sawp chu a na khawp ang a, chhuan tam tak daih tur leh hriat reng tlak khawpa nain kan thungrul dawn a ni,” a ti bawk.
Israel mi a nung chunga Hamas ho hren chungchang sawi chhuakin Benjamin Netanyahu chuan, “Mi nunrawng Hamas ho chet dan hi a rapthlak hle mai a, Israel mi pawisawi lo nunau te an tihlum a, mi in chhunga awm hle hle an chhung kua kuain an mang puk pui duh a, thalai rual intihlim lai an suat chiam bawk a, nunau awmnem zawk leh, naupang, pitar leh putar te a nung chungin an man duh a. an phuar hlawm a, an hnungkhirh a, an hal hlum a, an kap hlum bawk a. An nunrawnzia hi sawiin a siak lo ve!” a ti.
Netanyahu chuan Hamas nunrawnzia chu ISIS nen a tehkhin bawk a, “Hamas ho hi ISIS ang chiah kha an ni a. Khawvel ram rilru puitling zawk leh civilized ram ten sual muhlum, ISIS te chu an nuai chimit ta ang khan khawvel ram hrang hrangte hian Hamas nuai chimit turin Israel hi min thlawp a ngai a ni,” a ti.
Israel Prime Minister chuan Israel thlawptu US President Joe Biden leh khawvel ram ropui hruaitute chungah lawmthu a sawi a, “US President Joe Biden nen kan inbe reng a, min thlawpna leh min thlamuanna leh Israel ram venhimna kawnga a inpekna leh a insensona ah Israel mipui zawng zawng aiawhin a bik takin Joe Biden hnenah lawmthu ka sawi a, khawvel ram hruaitu dangte hnenah pawh tun hma aia min thlawpna avangin an chungah ka lawm tak zet a ni,” a ti.
A sawi zelnaah Benjamin Netanyahu chuan, “Hamas kan do hian Isreal rama kan khua leh tuite himna atan chauh kan do a ni lo va, khawvel ram hrang hrang tan muanna a lo awm theihna turin sakawlh rilru pu hmelma nunrawngte kan do va, an lakah beihpui kan thlak dawn tihna a ni zawk. Israel hian hnehna a chang ngei dawn a, Israel hnehna chu khawvel pum huam tan sual laka hnehna hlado chhamna a ni nghal dawn a ni,” a ti.
Hamas-in Israel a bum dan
all’s fair in love and war
Sap thufing pakhat chuan, “All’s fair in love and war” a ti a. A awmzia chu nula leh tlangval inhmangaihna chungchangah leh indonaah chuan engkim hi a thiang vek a ni,” tihna a ni mai awm e. Hmasang Grik mi fing Socrates khan inbum te, dawt sawi te hi a hmun leh a hun azirin a tha lo vek tihna a ni kher lo ve tih a lo sawi bawk a. Chûng thuthlung chu Palestinian Islamist group Hamas chuan a takin an rawn hmang tangkai ta a, Middle East rama sipai chak ber, Israel ram intelligence lam hmingtha Shin bet leh Mossad te meuh bum let hlauhvin October ni 7 khan Israel ram an rûn thut a, khawmual, boruak leh tuifinriat atangin Hamas commando ho chu Israel ram chhungah bulldozer, hang glider leh bike te hmangin an lut ta chiam mai a, mi 700 lai an tihlum a, mi 100 lai a nung chungin an man a, Gaza ramah an hreng ta a ni. Se bo hnua se kawng khar an sawi ang hlauh a lo ni ta a ni. Israel chu khawvelah namen lovin a mualpho va, an intelligence lam, Aman (Military Intelligence) te, Shin Bet (Israel internal security), leh Mossad (foreign intelligence service) te an hmingchhe ta hle mai.
Hamas-in Israel an bum dan tlangpui, a tawi thei ang berin ka sawi dawn a ni.
Hamas chuan Israel thuneitute mit hmuhah indona lam engto miah tawh lo angin an lang der a, Gaza Strip-a hna thawh tur nei mumal lote hna thawh tur, economic incentives lam lungkham ber angin an awm a. Israel chuan Hamas hi Israel do chungchangah a beidawng hulhual tawh angin an hmu a. Chutih lai chuan Gaza ram Hamas sipaiho chuan a lang a pauvin an sipaite rawlrala chet thut dan an lo zirtir char char a. Israel inrin lawk hmaa beih thut dan tur an lo duang lawk vek a, an sipai commando te chu kawla ni chhuak chhiarin an lo zirtir tlauh tlauh mai si a ni.
Hamas ho chuan Israel ram khaw hrang hranga Israel in leh lo lemte siamin an beih dan tur a lo zir ngar ngar a, ramri indaidanna bang sut chhiat dan tur te, sut chhiat veleha Gaza ramri hrula Israel khuate luhchhuah thut dan tur te, glider hmanga Israel rama thlawh luh dan tur te, pal an sut chhiat hnua a rang thei ang bera lirthei hmanga Israel ho chenna khua thlen dan tur te, an lo zir lawk tlut tlut mai a ni.
Kum 2021-a Israel-in Gaza a sawp hrep hnu khan Israel chuan heti hian a ngaihtuah a, “Gaza rama Palestinian te hi ngaihsak deuh ila, Israel lakah an rilru tui ang a nem deuh mahna,” tiin. West Bank lama in sakna lamah work permit sang tam tak a pe chhuak a, an hlawh pawh Gaza rama inhlawhte aiin a let 10 laiin a pe tam zawk a. An tifuh emaw an tih kha an lo tifuh lo chhiava a lo ni.
Hamas chuan lemchan an thiam a, kum hnih chhung chu Israel do tawh lo tur ang leh thuro nun nem nun ang puin an awm a, Gaza rama awm ve tho Islamic Jihad armed group phei chuan Hamas hi Israel lakah dâwl zawra zâwrah a puh a, anmahniin Israel ram hi rocket-in an kap fo ta hial a ni.
Hamas tanpuitu pawl hrang hrang pawhin Hamas chu a lang apauvin an dem a, West Bank lama thuneihna a fawng vuantu, Palestinian President Mahmoud Abbas pawl Fatah phei chuan Hamas chu ar pan chuk tui lo khawpa chhuahin an sawisel nasa a, Hamas hotute chu Arab ram hausa zawka an tlanchhia a, Gaza ram mipui retheite hnuchhawnin hotel changkang tak tak leh in nuam tak takah zu leh sa nen nuam an tawl niin an puh hial a ni.
Israel sipai hotute chuan Hamas hotu Yahya Al-Sinwar chu Juda ho thah aiin a ram mipuite dinhmun chawikan lam engto ta zawkah an ngai hman ta hial a ni. Hei hi inbumna vek a lo nih chu. Chutianga an inkar boruak a ziaawm lai denchhenin Saudi Arabia leh Israel ram chu inlaichinna tha zawk neih tumin hma an la mek a. Israel chuan kum hnih lai buaina nei lova an ram a humhim thei chu uan takah an lo neih mek a, hetih lai hian Hamas chuan an thil ruahman ruk chu a put ru ang tih an hlau hliah hliah a. thaw dep depin an thup char char thung a ni.
An han fimkhur laileng khawp a, Hamas hotu zingah pawh Israel beih an tum thu hi hre lo an tam mai! Hamas sipai rual 1000 lai pawhin an thil zir tlut tlut chu eng atan nge tih an hre na hek lo.
An thil lo ruahman ruk chu October ni 7, Juda ho Sabbath tuk khan an tipuilting ta. Operation chi 4-ah an then a, vawi leh khatah rocket 3000 lai an kap chhuak phawt a. Chutih rual chiah chuan Hamas sipai eng emaw zat chuan parachute ang thlawhna, hang-glider, leh motorised paraglider te hmangin Israel ram chhungah an thlawk lut ta sup sup mai. Heng parachute-a Israel ram thlawk lut ten Israel ram chhung, Gaza ramria khawmual lam an thunun velah Gaza leh Israel ram inkara daidanna bang sâng su chhe pawl an che ve ta nghal bawk a. Bomb leh bulldozer te hmangin daidaina thirlen chu hmun 7 laiah an su chhia a, Hamas sipai ho chu bike leh motorin Israel ramah an lut ta hum hum mai a. Ramri-a awm Israel sipai kulhte chu an luhchhuah zung zung a, Israel sipaite inbiak pawhna electronic hmanrua an tichhe vek a. Israel sipaite an man bawk a. Tichuan Hamas firfiak pawl chu an duh thalin an han che tak tak ta mai a. Rapthlak tak a ni. Mihring leh mihring inkara lainatna, khawngaihna leh zahngaihna tel map lova ramsa anga an han insuasam chu a rapthlak ngei mai.
Arpuia lungchhia, sanghara lunglawm tih ang maiin Gaza ramri hrulah hian Israel rawlthar leh tleirawl rual, mi 4000 lai mai chuan Supernova Festival, rimawi kut an nei a, an lo lam mup mup mai a. Hamas sipai hovin lainatna tel miah lova an han pawng kah leh an han phin darh chu a rapthlak lutuk a ni. Mi 260 lai an kap hlum a, mi eng emaw zat a nungin an man a, Gaza-ah an lirthei neih ang angin an hruai zut zut mai a ni. An lirthei hal chhiat pawh a namen lo khawp mai.
Isreal sipai General pension tawh, Yaakov Amidror, national security adviser to Prime Minister Benjamin Netanyahu lo ni tawh chuan, “Israel chhim lamah Israel intelligence an hlawhchham let der a, Israel sipaiten inralrinna an thlachham hlauh bawk a ni, phat ngaihna a awm lo,” a ti.
A sawi zelnaah Amidror chuan, “An lemchan kan lo awi tak tak kha thil atthlak tawpkhawk a ni a, kan tisual a ni. Kan tisual leh tawh lo tawp ang. Hamas hi zawi muangin, mahse chiang fahranin kan nuai chhe hlauh dawn a ni,” a ti.
Israel Defence Minister Yoav Gallant chuan, “Gaza ram chu kan la (seize)vek dawn a, ei leh bar, tui in tur, current, ei rawngbawlna gas, leh tui alh thei lam reng reng pawh kan hrek nghal vek dawn a ni,” a ti a. “Kan dote hi mihring an ni lo, sakawlh an ni a, an chet dan rapthlak ang chiah hian kan thungrul dawn a ni,” a ti.