Hamas tena an rukbo mitang an la kawl za chuang zinga pali chu Israel sipai ten an chhanchhuak a. Palestinian official te chuan Israel sipai te chuan mi thahnem tak an chhanchhuahna lamah an tihlum tiin a sawi.
Noa Argamani, 26, Almog Meir Jan, 22, Andrei Kozlov, 27, and Shlomi Ziv, 41, te chu nikum 7 October a Nova music festival neihna atanga rukbo an nih atanga thla riat hnuah chhanchhuahin an awm ta a ni.
Israeli force te chu vansang lamah puihin an awm bawk a, Nuseirat area ah Hamas te nen nasa taka an inkah hnuah mi tang te chu an chhanchhuak thei ta a ni.
Palestinian official te chuan Israel hmalakna avang hian nunna chan zingah hmeichhia leh naupang te pawh an tel tiin a sawi.
Gaza a Al-Aqsa leh al-Awda hospital te chuan an hnenah rung 70 phurh thlen a ni tiin an sawi a. Hamas sorkar media chuan al-Nuseirat refugee camp Israel in a beihnaah hian nunna chan mi 210 an tling tiin a sawi ve thung.
Israel chuan nunna chan mi 100 an tling lo tiin IDF thupuangtu Daniel Hagari chuan a sawi ve thung.
Mitang chhanchhuah hi IDF, Israel Security Agency leh Israel Police tena tangruala an neih a ni a.
IDF thupuangtu Daniel Hagari chuan intelligence report an dawn hnuah chet an lak thu sawiin Nuseirat a building pahnih atangin mitang te chu chhanchhuah an nih thu a sawi.
Operation neih laiin Israel sipai te chu nasa taka kahin an awm tia sawiin special forces officer pakhat chuan hliam tuarin a hnuah damdawi In-ah a thi tiin a sawi bawk.
IDF te chuan mi tang an chhanchhuah te chu an hriselna a that vek thu sawiin an chhung te nen pawh inhmuhtir nghal an ni bawk a.
Israeli Prime Minister Benjamin Netanyahu chuan Israel sipai te chu an themthiamna leh huaisennaah a fak thu a sawi bawk a.
“Mi tang te thiin emaw damin emaw kan laklet leh vek hma chuan kan chawl lovang” tiin Netanyahu chuan a sawi.
Defence Minister Yoav Gallant pawhin mitang pali chhanchhuah a nihna lamah inkahna nasa tak a thlen thu a sawi a. “Tun hi Israel defence establishment a kum 47 ka thawh chhunga operation huaisenthlak leh danglam ber pakhat a ni” tiin Gallant chuan a sawi.
United States chuan Israel hnenah hian intelligence support a pe niin CBS News chuan a sawi.
Mahse, US sipai te chu operation neihnaah an inhnamhnawih ve lo va, Gaza a chhawmdawlna pekna temporary pier pawh Israel sipai ten an hmang lo tiin tarlan a ni bawk.
Israel sipai ten chhanchhuak
![](https://theaizawlpost.org/wp-content/uploads/Clipboard01-1318.jpg)