Israel mi Hamas hel ten an man chhungte chuan Israel sorkarin Egypt kaltlanga Gaza city-a tanpuina a pek tur chu duh loin an lungawiloh thu an tlangau pui ve leh ta a. Israel Prime Minister Benjamin Netanyahu chuan nilaini khan Gaza Strip-a mipui chengte tan ei leh in tur leh tanpuina dang an mamawh te pek an nih tur thu a lo sawi tawh a ni.
Hei hi Hamas hel pawl ten Israel mi an man mek te chhungin duh loin a tih thlaphan thu an au chhuahpui ve leh ta a ni. ‘Inah rawn hruai haw rawh’ tih auhla hmangin Hamas hel hruaibo chhungte chuan thuneitute chungah an thinrimna an lantir a, “Gaza-a mipui chengte tanpui tura Israel sorkar hmalakna hian Hamas ten an hren mek chhungte hi min ti thinrim takzet a ni”, tiin an sawi a ni.
Hamas helho ten Israel mi an hren te hi an ti duhdahin lei hnuaiah thuhruk an ni a, ramsa ang maia enkawl an ni leh mihring nihna ang pawha enkawl an nih loh laia Israel sorkar-in anmahni nghaisatu tanpui a lo tum leh damdawi thlenga tanpui a lo tum chu an duh lo hle a ni.
Hetih lai erawh chuan US President Joe Biden-an Israel a tlawh laia a lo ngen tawh angin leh an inremsiam angin Israel chuan tui, damdawi leh chaw te Gaza chhim lamah Egypt kaltlanga pek a lo remti tawh a, mahse he tanpuina Israel ten an pekah hian Hamas hel ten an lo dawn ve chuan Israel a inrawlh nghal ang a, Israel checkpoints kaltlangin eng tanpuina mah pek an ni lo ang tiin Netanyahu chuan a lo sawi lawk ve bawk a ni.
Hemi zulzui hian President Biden leh Egyptian President Abdel Fattah el-Sissi te pawhin inremna lo siamin tanpuina phurtu truck 20 velin Rafah Crossing kal tlang phal a nih tur thu remna an lo siam ve bawk a ni. UN chhut dan chuan Gaza-a mipuite ni tin mamawh pe tur hian ni tin truck trip 100 vel mamawha chhut a ni.
Hamas ten Israel an beih ni October ni 7 atang khan Israel mi leh ram dang mi 150 – 200 vel chu Hamas leh Islamic Jihad te hian an la hreng tura ngaih a ni. Netanyahu chuan Biden nen an inkawmnaa a thil phut te sawiin, pakhatnaah chuan helho ten an mihren te an chhuah vat tur a ni, chumi tur chuan ngawrh takin kan bei mek a ni. Pahnihnaah Red Cross ten helho mi hren mekte an tlawh tur a ni. Pathumnaah chuan chaw leh damdawi te Israel ram atangin Gaza ah pek luh phal a ni lo.
Heng bakah hian Egypt ram atanga tanpuina pek chu Israel sorkarin a dodal lo anga mahse heng tanpuinate hi Hamas helho ten an dawng ve tur a ni lo.
Israel sorkar dem hle
