Mozambique-a pastor pakhat chu Bible-a Lal Isua tihdan anga ni 40 chawnghei a tumna lamah tuar lovin a thi.
Francisco Barajah, Santa Trinadade Evangelical Church dintu chu Beira damdawi Inah dinhmun chhe taka phurh luh a nih hnuah a thi a ni.
Ni 25 chaw leh tui tel lova hun a hman hnuah a rihna tlahniam turu tawhin mahni pawhin a ding thei lo zui tawh a, kum 39 mi chauh a ni bawk a.
A chhung te leh amah zuitu ten damdawi In an panpui nghal a, acute anaemia a neih bakah a digestive organ te a tha lo zui hman tawh a ni.
Serum hmanga rehydrate tum niin chaw pek tuma hmalak a ni chungin a tlai lutuk hman tawh a ni.
He pastor hi Messica, central province of Manica, Zimbabwe bula khuaa French teacher a ni bawk a.
Santa Trindade Church member te chuan an pastor hova chaw nghei an kalpui fo thu an sawi a, mahse, tun ang em ema engmah ei si lova rei tak chawnghei erawh an la kalpui ngailoh thu an sawi.
A unaupa Marques Manuel Barajah chuan an pastor chuan chaw a nghei ngei thu sawiin mahse a thihna chungchangah, “Ka unaupa hi blood pressure hniam avanga thi a ni” a ti thung.
Tun hi Bible a Chanchintha Mathaia ziaka Isua in ni 40 chaw a nghei anga nghei ve tuma chetlakna tumkhatna a ni lo.
Kum 2015 pawh khan ZImbabwe mi pakhat chuan ni 40 chaw nghei a tumna lamah ni 30 naah a thi a. Kum 2006 pawh khan British coroner pawhin British hmeichhe pakhat chuan a tum thu sawiin London-ah a tihpui thu a sawi bawk.
Isua tih dan anga tih ve tum pastor thi
![](https://theaizawlpost.org/wp-content/uploads/tap_logo-min-large.jpg)