Italian Open third round lut zingah Swiatek tel

Italian Open third round lut zingah Swiatek tel
French Open inbuatsaihna kal mekah Ningani khan defending champion Iga Swiatek chuan straight-set hmanga Italian wildcard Elisabetta Cocciaretto sawp chungin Italian Open third round a lut leh ta phawt a, kum nga chhunga he title vawili lak tlin a tum mekna kawngah harsatna sawi tham a la tawk lo.
Polish world number two hian minute 52 lek chhungin tualchhung player lakah 6-0 6-1 hnehna awlsam a sualchhuak hman a; 2023 quarter-final match-a Elena Rybakina nen an intum tuma hliam vanga a inhnukdawk tih loh kha chu he tournament bika a match khelh hnuhnung vawi 19-a match 18 chu straight-set vekin a chak!
Last 32 lamah Swiatek hian 6-3 6-3-a Elena-Gabriela Ruse of Romania hnehtu Danielle Collins a hmachhawn zui leh.
Kum 23-a upa Swiatek hian tunthla tawp lamah kum ruk chhunga a vawingana atan May ni 25 atanga khelh tan tur French Open title a beisei zui dawn a, chu mi atana inrintawkna a neih chhah theihna’n tunhnai kum riat liamta chhunga quarter-final chin tal a la thlen zat zatna Italian Open-ah hian a title kawl lai a humhim a pawimawh dawn hle niin a lang a, a chhan pawh tun season-ah eng trophy mah lak a la nei lo a, he clay title tal hi a hum zawh loh leh chuan Roland Garros atan a kut a zum deuh palh thei!
Ningani inkhel dangah Japan nu Naomi Osaka pawhin clay leilunga a chetthat tluang lai chhunzawmin round of 64 match pakhatah set hmasa ber hloh zet chungin Swiss lucky loser Viktorija Golubic lakah 2-6 7-5 6-1 hnehna a sualchhuak leh a, he leilungah hian a zawn zatin match sarih a chak tluang tling ta hial a ni.
Kum 27 mi Osaka hi clay leilungah a chetha thei tlat lo a, French Open third round pawh la pel ngai lo ni mah se kumin chu a dan a rawn dang ta tlat a, karliamta maia L’Open 35 de Saint-Malo title a lak kha a clay-court title sualchhuah hmasaber niin, nu a nih hnu July 2023 hnu lama WTA title hrim hrim a lak leh vawikhatna a ni nghal bawk.
Osaka hi ninth seed Paula Badosa nena insu tur an nih laiin hliam avangin Spaniard Badosa a inhnukdawk a, a aiah player nem zawk deuh tura ngaih Golubic a hmachhawn ta zawk a ni.
Grand Slam-a vawili champion ve tawh Osaka hian Brazilian 18th seed Beatriz Haddad Maia laka 6-0 6-3 hnehna chang ve bawk Marie Bouzkova of the Czech Republic chu third round lamah a tum zui leh.
Third round lut zingah Italian sixth seed Jasmine Paolini pawh telin, ani hian New Zealander Lulu Sun chu straight sets 6-4 6-3-in a hneh a, second-round lama hliam avanga inhnukdawk Czech Petra Kvitova theih loh avanga walkover-a tlang ta Tunisian Ons Jabeur nena an inhmachhawn leh a, an result tarlan hman a ni lo.
Jessica Pegula pawh-in 6-4 6-2-in a chipui American nula Ashlyn Krueger hnehin Belgium star Elise Mertens lakah fiahna hraw zawk a hmachhawn a; American ve bawk Madison Keys pawhin Varvara Gracheva of France laka 7-6 (7-4) 6-1 hnehna a chan hnuah a chipui Peyton Stearns a su zui ve leh bawk.