Pathianni zan khan Davis Cup final khelh a ni a, champion lai Italy chuan 2-0 a Netherlands hnehin an champion zawn leh. An champion nawn theih nan world No. 1 Jannik Sinner-an a thawhhlawk hle.
Malaga khawpuia final khelh Italy an khel tha viau a, mimal inelnaah an chak zawn vangin champion tura an mamawh an nei nghal. Italy tan hian Matteo Berrettini a inlan hmasa a, Botic van de Zandschulp a hmachhawn. Berrettini leh Zandschulp te hi set khatnaah an inhnehtawk viau a, break pawimawh tak a neih vangin Berrettini-a’n set khatna a la. Set khatna a lak hnuin Berretiini hi set hnihnaah a khel tha zi viau a, game hnih bak a hloh tawh lovin, 6-4 6-2 in hnehna a chang.
Berrettini hian Davis Cup 2023 kha khup hliam vangin a hmachhawn thei lova, a thiante final khel chu hnai tak atangin a lo thlir. 2024-a an champion theih nan a thawhhlawk ta viau thung a, Netherlands lakah 1-0 in hma a hruaipui ta hial a ni.
Harsatna lian tawk lova Berrettini a chak hnuin World No. 1 Jannik Sinner a inlan zui ve leh a, Tallon Griekspoor lakah Sinner hian fiahna hautak a hmachhawn. Mimal inkhel pahnihnaah hian Sinner leh Griekspoor ten hmuhnawm takin bul an ta a, set khatnaah tie-break khelh a ngai ngal. Tie-break-ah Sinner a chungnung ta viau thung a, harsa taka set a lak hnuin set hnihnaah set hnihnaah erawh a kawng a awlsam viau tawh thung a, game hnih bak a hloh tawh lo. Griekspoor lakah Sinner a chak leh tak vangin Italy chuan 2-0 a Netherlands hnehin an champion nawn leh ta a ni.
Kum kal meka Tennis inelnaah Italy an che ropui hle. Mipa inelna Davis Cup-a an champion hma lawkin hmeichhe inelna Billie Jean King Cup-ah Italian nula te an lo champion tawh bawk. Team anga inelnaah khawvel an awp a, mimal inelnaah Jannik Sinner a ropui viau bawk. Sinner hian kum 2024 chhungin match 76 a khel a, vawi ruk chiah tlawm zawkah a tang. Australian Open leh US Open-ah a chmapion in Grand Slam pahnih a la a. World No. 1 ni chunga kum a khar bakah ATP Finals-ah a champion bawk. Mimal inelna a chet that bakah ram tan a chetha zui viau bawk hi Jannik Sinner ropui lehzualna a ni.
Italy an champion nawn leh
