World Cup khel tur zawnna hnuhnung play-off final-ah an chak loh vangin Italy chuan World Cup 2026 an khel phak lo. World Cup-a vawi li ngawt champion tawh Italy hian USA President Donald Trump zarah World Cup khelh theih beiseina nei thar leh mah se FIFA in Italy hmun pek an tum loh thu an sawi chiang ta a, World Cup 2026-ah Italy tan hmun a awm lo nawn leh.
World Cup khel tur Iran chu USA leh Israel te nen an indo mek. Indo mek an nih vangin World Cup 2026 thlengtu langsar ber USA President Donald Trump a special envoy Paolo Zampolli chuan Iran chu World Cup khelh tir lova, an aiah Italy khelhtir zawk turin Donald Trump chu Fifa President Infantino hnenah thlen turin a ngen. US special envoy Paolo Zampolli chuan Financial Times hnenah an President Donald Trump hnenah World Cup-ah Iran aia Italy khelhtir zawk tura ngenna Infantino hnenah thlen tura a ngen ngei thu Financial Times a hrilh.
Paolo Zampolli chuan, “Italian ka ni a, US i n a thlen tur World Cup 2026-ah hian World Cup a vawi li ngawt champion tawh Azzurri hi inlan ve se ka duh em em a ni,” tiin Iran thlak a duh chhan a sawi a. Zampoli thusawi chungchangah hian Fifa chuan sawi zui an nei mai rih lo a, ngawih an chuh deuh rih.
Fifa an ngawih laiin Iran lam erawh an rawn ter ve at thung a, Iranian embassy chuan Zampolli-a’n Iran thlaka Italy zawk World Cup khelhtir a duh dan chu ‘thinglung lama eirukna lian tak a ni’ an tihsak a. “Italy hian football rampui an nihna chu politics vir velah ni lovin, khelmual chhung atang ngeiin an hlawhchhuak zawk tur a ni,” an ti let ve sak bawk.
World Cup 2026 atanga Iran petchhuah a, Italy la lut tura rawtna chungchangah hun eng emawchen ngawih an chuh hnuin khawvela football thuneitu sang ber Fifa an tawngchhuak ve ta a. Fifa President Gianni Infantino chuan, “Iran hian World Cup an khel ngei a, chu chu a chiang e!,” a ti. Iran sawrkar thupuangtu Fatemeh Mohajerani pawhin Iran chu World Cup khel turin an theihna sang ber hlana Al Jazeera hnenah a lo sawi zui ve bawk.
Fifa President Infantino a tawngchhuak tawh chung hian Indo mek Iran in an do mek USA-ah World Cup khela an zin tur hi an him loh hlauhthawnna lian tak a awm zui reng tho a. Iran team dodalna lian tak a awm zui reng tho thung. Lai taka thlirtute erawh chuan Iran dodal an nih a, hnawl an ni dawn a nih chuan USA ngei pawh dodal a, hnawl ve turah an ngai nghet bur a. “Football chu inthliarhranna awm lo a ni tur a ni,” an ti.
Iran chungchangah thuthang neuh neuh a awm lai hian US President Donald Trump chuan an ramin Iran team chu an theihna sang ber hlan a, that chhuah tak chunga an lo dawnsawn tur thu a sawi a. A inrawlh lohna tura inrawlh duh ngai lo mi a nih thu a sawi tel bawk.
World Cup 2026 hi June ni 11 atangin khelh tan a ni dawn a, USA, Canada leh Mexico ten an inthlen tawn dawn a nih kha. Titi siam tam tak Iran hi Group G-ah Belgium, New Zealand leh Eygpt te nen an awm tlang a. YMA day-ah New Zealand an hmachhawn ang a, June 21-ah Belgium an hmachhawn zui leh ang.
Italy tan WC-ah hmun a awm lo
