‘JACKBOYS 2’ Billboard 200 No.1-ah debut

‘JACKBOYS 2’ Billboard 200 No.1-ah debut
Travis Scott leh a JACKBOYS project ‘JACKBOYS 2’ chu Billboard 200 (albums) chart No.1-ah a debut a. Justin Bieber, Clipse, TWICE, ATEEZ leh GIVEON te pawh top 10-ah an lang.
Billboard 200 hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna bakah streaming atanga album hralhna tlukpui leh album-a hla a mala hralhna atanga album tlukpui te belhkhawm thin a ni.
‘JACKBOYS 2’ hi kar khat chhungin (tracking week-ah ni nga chiah an zuar chhuak hman) US-ah 2,32,000 hralhin, chung zinga 1,60,000 chu album tak tak hralhna niin, streaming atangin 72,000 (on-demand official stream maktaduai 94.86) niin, album-a hla a mala hralhna erawh chhiar tham a ni lo.
‘JACKBOYS 2’ hi hla pasarih awmna niin, a hnu lawkah hla 10 dah belh lehin, hla 17 awmna album a ni ta a, tracking week ni hnuhnung berah chuan hla 20 awmnaa tilianin, album thar an tichhuak leh tawh bawk a, hla pasarih awmna bakah hla 17 leh hla 20 awmna album hralhna te hi album pakhat anga belhkhawm vek a ni.
Justin Bieber album thar ‘SWAG’ chu No.2-ah debut-in, kar khat chhungin 1,63,000 a hralh thei a, chung zingah 1,55,000 chu streaming atanga album tlukpui (on-demand official stream maktaduai 198.77) a ni a, Justin Bieber album tlangzarh tawhah chuan kar khat chhunga stream nasat ber a la ni. Album tak tak hralh chu 6,000 niin, album a hla a mala hralhna atangin 1,000 a tling thei bawk. Hla 21 awmna ‘SWAG’ hi Justin Bieber album, he chart top 10-a lang thei 11-na a ni.
Morgan Wallen album “I’m the Problem” chu 1,47,000 hralh lehin, kar riat a No.1 hnua No.1 atangin No.3-ah a tawlh ta.
Clipse album thar ‘Let God Sort Em Out’ chu No.4-ah a debut a, tun kum 16 chhunga Clipse (Pusha T leh Malice) te album tlangzarh leh hmasak ber a ni a, Clipse anga an top 10 album pahnihna a ni bawk. ‘Let God Sort Em Out’ hi kar khat chhungin 1,18,000 hralhin, chung zinga 59,000 chu streaming atanga album tlukpui (on-demand official stream maktaduai 77.49) niin, album tak tak hralh chu 58,000 a ni a, album-a hla a mala hralhna atangin 1,000 a tling thei bawk.
KPop Demon Hunters soundtrack chu 85,000 hralh lehin No.2 atangin No.5-ah a tawlh ta. KPop Demon Hunters hi Netflix animated movie niin, US-ah Netflix Top 10 Movies-ah No.2 kar li chhung a ni tawh a, a film hi cinema hall-a pawh thlan bik tlem azawngah an tichhuak bawk.
Kpop hmeichhe group TWICE album thar ‘THIS IS FOR’ chu No.6-ah debut-in, 80,000 an hralh a, chung zinga 68,000 chu album tak tak hralhna niin, streaming atangin 12,000 (on-demand official stream maktaduai 16.21) niin, album-a hla a mala hralhna chu chhiar tham a ni lo. ‘THIS IS FOR’ hi TWICE album he chart top 10-a lang thei pasarihna a ni.
Kpop group dang ATEEZ album ‘GOLDEN HOUR : Part 3’ chu top 10 atanga a chhuah tawh hnuah No.7 a rawn kai thar leh a. He album hi a deluxe edition an tichhuak thar a, chu chuan album hralh a tikal thar leh ta a ni. ‘GOLDEN HOUR : Part 3’ hi 79,000 an hralh leh a, chung zingah 70,000 chu album tak tak hralhna niin, streaming atangin 8,000 (on-demand official stream maktaduai 11.21) niin, album-a hla a mala hralhna atangin 1,000 a tling bawk.
GIVEON album thar ‘BELOVED’ chu No.8-ah a debut a, he chart-a a album top 10 kai thei pahnihna a ni. ‘BELOVED’ hi 44,000 hralhin, chung zinga 36,000 chu streaming (on-demand official stream maktaduai 47.78) niin, album tak tak hralh chu 8,000 a ni ve thung.
Chart No.1 hlui Morgan Wallen ‘One Thing at a Time’ chu 39,000 hralh lehin No.3 atangin No.9-ah a tawlh a, chart No.1 hlui bawk SZA ‘SOS’ chu 37,000 hralh lehin No.4 atangin No.10-ah a tawlh ta bawk.