Uganda-a Nakasongola jail tang zinga pakhat chu mpox hri kai ngei a ni tih hmuhchhuah a ni a, a bik taka awmna turah dah hran nghal niin, a tul anga enkawlna pek nghal a ni bawk.
World Health Organization (WHO) chuan mpox hri leng chu khawvel pumah a darh leh thuai thei reng nia sawiin, health emergency a lo puang tawh a, tunah hian Congo, Burundi, Uganda leh Rwanda ramte chu inralring nasa zual turin a ngen nghal.
Uganda a jail tang pakhat hnen atanga he hri an hmuh takah chuan jail tang dangte dinhmun pawh endik nghal vek a ni a, inhnaih lo tur leh inawmpawlh lutuk lo hram hram turin an hrilh nasa hle.
Mpox hri leng hi covid ang mai khan inkaichhawn awlsam tak a ni a, a veite pawh a bik taka enkawlna pek leh dah hran ngai zel an nih avangin fimkhur a ngaih bakah, thihpui hial theih natna a ni a. Uganda sorkar pawh hian theihtawp an chhuah nghal thu sawiin, an ram chu dinhmun duhawm lo ber thleng thei reng a nih avangin fimkhur turin an chah zui nasa hle bawk.
Jail chhungah mpox kai hmuchhuak
