Jaishankar-a’n buaina chungchang Russia, France leh EU sawipui

Jaishankar-a’n buaina chungchang Russia, France leh EU sawipui
Indian External Affairs Minister S Jaishankar-a chuan Russia, France leh European Union (EU)-a a thawhpuite chu New Delhi-in Asia khawthlanga buaina chhuak mek tur chungchang a sawipui.
Jaishankar-a hian social media-ah India-in ‘Asia khawthlang buaina a hmuh dan leh lo thleng thei nia a hriat leh a kaihhnawih hmalaknate’ chu Russian Foreign Minister Sergey Lavrov-a hnenah a hrilh tih a tar lang a. Ram pahnih inkara thawhhona awm mekte pawh an thlir dun bawk.
Lavrov-a chuan thil awm dan chu ‘a pangnagia awmtir leh’ a tul thu a sawi uar hle niin Russia embassy thuchhuah chuan a tar lang a. Foreign minister pahnihte hian Shanghai Cooperation Organization (SCO) leh Brics ten ‘thil awm dan tihdaih tuma an hmalakna leh a inhnamhnawih zawng zawngten an hlawkpui tlan theuh tura inremna siam an tumna’ chu tha an ti dun tih thuchhuahah hian a tar lang bawk.
Jaishankar-a chuan EU foreign & security policy chief Kaja Kallas nen Asia khawthlang buaina leh a nghawng dan chungchangah ‘inbiakna tangkai tak’ an neih thu a sawi a. French Foreign Minister Jean-Noel Barrot nen pawh ‘an hmuh dan an inhrilh tawn’ tih a sawi bawk.
Lavrov-a hian Iran Foreign Minister Seyed Abbas Araghchi-a pawh a bia a, an ram chuan ‘a ram thuneihna leh ramri humhalh chhunzawm zel a tum tlat’ tih a sawi uar hle.
Araghchi-a chuan UN Security Council chuan Israel leh US-te thiltihin khawvel muanna leh himna a bawhchhiatna langsar tak chu a dem ngei tur a nih thu a sawi tih Iranian foreign ministry chuan a tar lang.
Lavrov-a chuan US leh Israel-in Iran laka sipai chakna an hmang chu a dem hle a, Russia chuan ‘an chhehvel himna tihchakna tura a thil tha tak tak hlan a inpeih thu’ a sawi bawk.
Iranian foreign ministry chuan Thawhlehni khan Araghchi leh Jaishankar te phone-a an inbiak thu hi puangin foreign minister hian Iran laka US leh Israel ‘sualna’ hrang hrangte a sawi a, indona ni hmasa bera Minab-a hmeichhe naupangte elementary school-a missile hmanga beih leh civil mite hmun leh vantlang thil nasa taka beih a nih te pawh a tel tih a sawi.
Araghchi-a hian US leh Israel-ten Strait of Hormuz kaltlanga ‘bungraw thawn venhimna a tihderthawn’ vanga thil thleng pawh sawiin, Persian Gulf-a ‘himna awm lo leh harsatna thleng’ chu US-in ‘beihpui a thlak leh muanna tibuaitu thiltih’ rah a nih thu a sawi bawk.