Jaishankar-a’n Chinese president hmu, ramri sawi dun

Jaishankar-a’n Chinese president hmu, ramri sawi dun
Kum nga hnua a vawi khat nana China tlawh mek, External Affairs Minister S Jaishankar-a chuan Thawhlehni khan Chinese President Xi Jinping kawmin Ladakh khawchhak lama ram pahnih innghirnghona nasa tak awm tifel tura indawr zel a ni.
Jaishankar-a hi China-ah hian Shanghai Cooperation Organisation (SCO) foreign ministers’ meeting-a tel tura kal niin Chinese president hnenah hian tun hnaia an ram inkarin that lam a pan hret hret chu lawmawm a tih thu a hrilh.
“Tukin khan President Xi Jinping-a chu Beijing-ah SCO foreign minister dangte nen kan hmu a. President Droupadi Murmu leh Prime Minister Narendra Modi aiawhin chibai ka buk a. President Xi-a hnenah hian tun hnaia kan ram hnih inkara hmasawnna awm chu lawmawm ka tih thu ka hrilh a, kan kaihhruaina hnuaia thil tha a awm chu a hlu ka tih thu ka hrilh,” tiin Jaishankar-a hian Thawhlehni tuk khan X-ah a tar lang.
Tun hi June, 2020-a Galwan Valley-a ram pahnih sipaite an inpheksual hnua an inhmuhna hmasa ber a ni a. October, 2024 khan inhnuhkirna tura inremna siamin Demchok leh Depsang-a inepna hmun atangin sipai an hnuk kir ve ve.
Hemi hnuah hian ram pahnihte hian an inkar tihthat lehzual tumin hma an la zui zel a, ramria inrem lohna awmte chu zawi zawiin hma a ziaawm zel.
Jaishankar-a hian Thawhtanni khan Chinese Foreign Minister Wang Yi-a pawh a lo hmu tawh a, Line of Actual Control (LAC) hrula an inepna tihnep dan turte an sawi dun.
“Thla kua liam ta chhung khan kan inkar a that zawk theih nan hma lak reng a ni a… Tunah hian ramri kaihhnawiha hma lakna tur pawh a la awm a, heng zingah hian inepna tihtawp pawh a tel,” tiin a sawi.
Union minister hian China hruaitu hnenah hian ram leilung hausakna thil pawimawh zual bikte thawn chhuah a khap chu ‘tinep turin’ a thlen bawk.
An inrem lohna chu an inmil lohna ni lo se, an inelna pawh boruak chhia siamtu ni lo se tha a tih thu a sawi bawk.
Jaishankar-a’n a tlawh hma hian June thla khan Defence Minister Rajnath Singh-a chu Qingdao-ah SCO defence ministers’ meeting-ah a lo tel tawh a. Kum 10 chuang hnua Indian defence minister zinga China tlawh leh hmasa ber a ni.
Hruaitu pawimawhten China an tlawh hi kumin kum tawpa Prime Minister Narendra Modi-a’n SCO Leaders’ Summit-a Beijing a tlawh tur hmahruai zel a ni.
India leh China hi ramria buai reng an ni a, tun hnaiah an inrem lohna dah thain boruak a daih hret hret zel a. Hetih mek lai hian Dalai Lama-a thlaktu tur chungchang leh India-in Pahalgam beihna a thlen hnua Pakistan beia Operation Sindoor a kalpuia Islamabad lam a tan zawk avanga an inkar la khi te chu an mutan lian a la ni.