Jaishankar-a’n Iranian FM bia, ram pahnih inkar sawi dun

Jaishankar-a’n Iranian FM bia, ram pahnih inkar sawi dun
External Affairs Minister S Jaishankar-a chuan Pathianni khan Iranian Foreign Minister Seyed Abbas Araghchi-a chu telephone-a biain Asia khawthlang lama buaina awm karah ram pahnihte inlaichinna bakah an chhehvel leh khawvel huapa thil thleng hrang hrangte an sawi dun.
Jaishankar-a hian an inbiakna chungchang hi X-ah tar langin, “Iran Foreign Minister Seyed Abbas Araghchi hnen atangin call ka dawng a, tun dinhmuna thil thleng mekte sawi dun a ni,” a ti.
Hemi hma hian Jaishankar-a hian Qatar Prime Minister Sheikh Mohammed bin Abdulrahman bin Jassim Al Thani-a leh United Arab Emirates Foreign Minister Sheikh Abdullah bin Zayed Al Nahyan-a te pawh a bia a, Asia khawthlang buaina chungchang leh khawvel pum huapa energy phurhna buai meka nghawng a neih dante a sawipui a ni.
Indian hruaituin ram dang hruaitute a biak hi US President Donald Trump-a’n Iran hnena vauna thar a tihchhuah hnua Asia khawthlanga boruak rit tak a awm mek laiin a ni a. Thawhlehni hmaa Strait of Hormuz chu lawng kal theiha hawn leh a nih loh chuan Tehran-a power plant leh leite tihchhiat vek a nih tur thu American hruaitu hian a sawi a ni.
US-Israel tang dunin Islamic rama beihpui an thlak hnua Iran-in khawvel tuialhthei leh boruakalhthei phurh 20% vel kalna lawng kawngpui, Strait of Hormuz a khar hnuah khawvel pumah tuialhthei leh boruakalhthei man hi a sang chho hle tawh a ni.
Hetih lai hian Iran chuan India ram telin a thian tha ram lawngte chu Strait of Hormuz kaltlang hi phalsak nia sawi a ni a. Indian lawng pasarihin indona chhuah hnuah an paltlang tawh a, heng zinga a tam zawk chuan a tum ram thleng tawhin pan mek pawh an la awm a. Hetih rual hian la tangkhang pawh eng emaw zat an la awm ve tho bawk.
US-Israel tang dunin Iran an beih hnuah Indian hruaitute chuan Tehran-a sorkar hotute bakah an thenawm ram hruaitute an be zing hle tawh a. Lawng kawng bakah hian heng rama a khua leh tuite himna ngai pawimawhin a biak ram hruaitute hnenah pawh an himna tura thawhpui turin a sawm zel hlawm a ni.