Jaishankar-a’n Ukrainian foreign minister a kawm

Jaishankar-a’n Ukrainian foreign minister a kawm
External Affairs Minister S Jaishankar leh Ukrainian Foreign Minister Andrii Sybiha chu Thawhlehni khan inkawmin ram pahnih inkar bakah Russia-Ukraine indona titawp tura thil thleng mekte an sawi dun.
Hruaitu pahnihte hi Raisina Dialogue-a inhmu niin Mumbai-ah Ukraine consulate thar hawn a ni nghal bawk a. US President Donald Trump leh Russian President Vladimir Putin te inkahhai chungchanga an inbiak hma lawkin an inkawm a ni.
Jaishankar-a chuan Sybiha hian muanna a awm theih nana thil awm dante a hrilh tih a sawi a. “Hetianga Ukrainian rawtna min hrilh hi ka lawm hle a ni,” tiin social media-ah a tar lang.
“Vawiin hian Mumbai-ah Consulate General of Ukraine thar hawn niin sorkar mi pawimawhte tan visa-free travel atan inremna siam nghal a ni a, hei hian kan inkungkaihna a tinghet zel ang,” a ti bawk.
Sybiha pawhin Jaishankar-a hnenah hian an rama muanna a awm theih nana kawng zawh mek a hrilh thu a social media-ah a tar lang ve bawk.
Consulate thar hawn pawh tar langin, “Indo laiin India nen kan inpawhna huang kan zauh va. Ram pahnih insumdawn tawnna, thawhhona leh inbiakna a tipung zel ang,” a ti.
Sybiha hi Russia-Ukraine buaina sawihona, Raisina Dialogue-ah a tel bawk a. He intawh khawmna neih ruala Jaishankar-a’n ram dang foreign minister leh mi pawimawh a kawm tam tak zingah a tel.
Jaishankar-a hian Nepal Foreign Minister Arzu Deuba pawh an inkar thil a sawipui a. Deuba-i hian mihring inpawh tawnna leh palai intirh tawnna tur thil tam tak an sawi tih social media-ah a tar lang.
“India-in Thenawm Dah Pawimawh Hmasak Policy a nei a, chumi atan chuan Nepal hi India-in a kawp atana a dah hmasak zinga mi a ni,” a ti bawk.
Jaishankar hian Maldivian Foreign Minister Abdulla Khaleel pawh a kawm a. Khaleel-a hian an thawhhona tihchangtlun zel dan tur leh kawng hrang hranga huang zauh dan tur an sawi tih social media-ah a tar lang.
Jaishankar-a hian UK National Security Adviser Jonathan Powell pawh ram pahnih inkar bakah khawvel himna a sawipui a. Luxembourg Foreign Minister Xavier Bettel nen UN siam that dan tur te, Ukraine dinhmun leh India-EU inkungkaihna te an sawi dun.
Filipino Foreign Minister Enrique Manalo-a nena an inkawmnaah zau zawka inpawhna, tuipui, infrastructure leh Asean inpawhna thuk zawk a awm dan turte Jaishankar-a hian a sawipui.
Jaishankar ahian Thai Foreign Minister Maris Sangiampongsa pawh kawmin digital tech, inpawhna leh ei leh in lam te a sawipui bakah thla thara Prime Minister Narendra Modi-a telna tur, Bangkok-a BIMSTEC summit neih turte an sawi dun.
Jaishankar-a hian International Atomic Energy Agency chief Rafael Grossi, Antigua & Barbuda Foreign Minister Chet Greene, Latvian Foreign Minister Braze Baiba leh Peru Foreign Minister Elmer Schialer Salcedo te pawh a kawm bawk.