Youtuber lar, professional boxing luhchilha hming chher zui tak Jake Paul chua nilai ni khan UFC fighter lar Nate Diaz nen an inhnek dawn tih a puangchhuak.
Jake Paul hian boxing a luhchilh hnuin hnehna a chang zawn a, vawi ruk a chak zawn hnuin February thla khan a vawi khat nan hneh loh a tawng a. Palian champion Tyson Fury-a nau Tommy Fury a hneh lo. A hneh loh Fury nen hian inhnek nawn leh tura ngaih an nih laiin mi dang hmachhawn a duh ta zawk a, UFC fighter lar Nate Diaz nen August ni 5 a inhnek turin inremna an nei thei ta a ni. Jake hian January thla khan Professional Fighters League hmachhawn turin contract a lo ziak tawh a. He contract-ah hian Diaz nen hian vawi hnih an inhmachhawn ang a, boxing ring-ah inhmachhawn phawtin, MMA dan hnuaiah an inhmachhawn zui leh dawn niin tarlan a ni.
Paul hmachhawn tur Nate Diaz hian infiamna rothap UFC-ah hming a chher hnuin September, 2022 khan UFC a chawlhsan. UFC-ah inhnek a thiamzia leh a tawrhchhelzia a lo lantir tawh thin a. Boxing a hmachhawn hmasak na ber tur ni bawk mah se Jake Paul lakah mit la takin a inlan theih ngei a beiseiawm. October, 2022 khan Jake Paul-a team te nen hian an lo intibuai hlak tawh nghe nghe a, hei hian August ni 5-a an inhnek tur hian ngaihven a hlawh phah leh zual.
Jake Paul hmachhawn tur Diaz
