Pathianni zing khan UFC fighter lar Nate Diaz chuan boxing-ah Jake Paul a hmachhawn a, boxing a khelh hmasak berah a chak lo nghal.
Youtuber lar, Boxing a luh chilh hnua zeihawi chho ta viau Jake Paul hian UFC Fighter lar Nate Diaz lakah bul a tan tha viau a, round khatnaah a khingpui a chhaihbuai nghal. Round khatnaah hian Diaz a talbuai nghal viau a, knockout in a tlawm nghal teuh hle. Talbuai nghal viau mah se fighter huaisen leh tuarchhel a nihzia a lantir nawn leh a, a insiamtha chak viau.
Round hnihna atang round lina tawp thlengin Nate Diaz hi mit la takin a inlan a, round nganaah a tlu ta tlat thung. Tlu mah se a tlu hlen lova, tha takin a khingpui a hmachhawn zui leh. An inhnek rei telh telh a, Nate Diaz a tha tawlh tawlh. Round riatnaah phei chuan a chungnung zawk viau. Round kuana leh round 10-naah pawh mit la takin a inlan zui leh a, round 10-naah a thiam thil hmangin Jake Paul nghawngah a kuah hman thuak a, UFC ni lova, boxing khel zawk an ni tih hrechhuak leh thutin a uang zui hlak nghe nghe. Hmuhnawm takin inhnek a tawp a, Jake Paul chuan 97-92, 98-91, 98-91 in hnehna a chang zui ta a ni.
Youtuber lar Jake Paul hian boxing a luhchilh hnuin inhnek vawi 8 a hmachhawn tawh a, vawi khat chiah tlawm zawkah a tang a, a hneh loh awmchhun hi Tomy Fury a ni. Nate Diaz nen hian inhmachhawn nawn leh a duh thu a sawi a, MMA dan hnuaiah an inhmachhawn ve tawh thung mai thei.
Pathianni zing vek khan Amando Serrano leh Heather Hardy te inhnekin, kawnghren an inchuh a, Serrano chuan hnehna changin a kawnghren a humhim. .
Jake Paul lakah Nate Diaz a chak lo
