James Dokhuma chanchin zirho
Govt. Hrangbana College-a Mizo Department leh Mizo Language Development Board tangdun buatsaih James Dokhuma kutchhuak thawnthu zirhona national seminar chu Ningani atang khan neih a ni a, vawiin – Zirtawpni hian chhunzawm a ni ang.
Govt Hrangbana College-a neih seminar hawngtu Mizo Language Development Board chairman R Lallianzuala chuan, James Dokhuma thawnthu ziah thiam zia, a thawnthu ziah hmanga Mizo culture a vawnnun that zia, lehkha zir sang lo tak ni chunga ren tin daih lehkhabu ziak thei a nih dan bakah a lehkhabu ziah hlu tak tak hmanga Mizo tawng tihausatu leh tihmasawntu a nih avanga Mizo zinga Bhasha Samaan dawng hmasa ber a nih dan, language and literature huangah Mizo zinga Padma Shri dawng hmasa ber a ni, tih te a sawi. A ni bakah hian R Lalrawna leh B Lalthangliana leh midangten James Dokhuma chanchin an sawi bawk.
Hun hnihnaah James Dokhuma a thu leh hla zir a ni a. College leh university-a zirtirtute leh research scholar-te bakah mithiam hrang hrangin James Dokhuma thawnthu kawng hrang hranga an zirchianna paper an sawizau a ni.
Ni hnih awh he national seminar-ah hian thupui hrang hrang 18 sawiho tura chhawp chhuah a ni a. Heng thupui hmanga thuziak hi remchangah lehkhabua la tih chhuah tum a ni.
James Dokhuma chanchin zirho
