Basketballer ropui bera ngaih LeBron James leh a fapa Bronny James te chu NBA pre-season game-ah Los Angeles Lakers tan an inlan a. NBA chanchinah club pakhat tan pa leh fapa khel tlang hmasa ber an ni a, NBA record thar an siam.
NBA club lian LA Lakers hian thawhtan zing khan NBA pre-season-ah Phoenix Suns an hmachhawn a, 118-114 in hnehna an chang. Suns an hneh tum hian Lakers player pawimawh LeBron James a inlan a. Quarter hnihnaah LeBron James-a fapa Bronny James chuan mual chhung lutin Suns a hmachhawn ve leh bawk. Mualchhungah James te pafa lutin, NBA a thil thleng ngai lo an thlentir a, record duhawm tak an siam.
A fapa nen an inlan tlan tumin LeBron James hian point 19 a thawkchhuak a, assist vawi li a neih bakah ball sawhlet vawi nga a dawng tling bawk. Hetihlai hian a fapa Bronny James erawh chuan minute 13 a khelh chhungin point a thawkchhuak lova, ball sawhlet vawi hnih a dawn bakah turnover vawi li a nei bawk. Bronny James hi LA Lakers in second-round draft-ah an club a khel turin an ziak lut a, University of Southern California atangin a pa khelhna LA Lakers chu kum hnih daih contract ziakin a zawm. Suns an hmachhawn tumin Bronny James hian kum 20 a tling chiah a, NBA player tha tak nih theihna hun tha a nei.
Bronny James-a’n NBA-ah bul a tan ve ek ek laiin a pa LeBron James erawh chuan NBA-ah season 22 chhung zet a inlan tawh thung a. NBA a point thawkchhuak hnem ber a nih bakah NBA-ah vawi li ngawt champion tawhin, MVP ah vawi li thlan a lo ni tawh bawk.
NBA Season thar 2024-25 hi October 22-ah khelh tan a ni dawn a. LeBron James te pafa khelhna Los Angeles Lakers hian Minnesota Timberwolves hmachhawnin bul an tan ang.
James te pafa in NBA record an siam
