Hollywood star Jamie Foxx chuan August ni 4 khan Instagram-ah, “Isua an tihlum a…Nangpawh engtin nge an tih che i rin? #fakefriends #fakelove,” tih a post a, mahse, he a thu post hian social media lamah sawisel a hlawh zui tak avangin a delete leh tawh a, thupha chawina a tichhuak leh ta zawk a ni.
Jamie Foxx-a thu post hi Juda te huatna lam rawngkai a ni tiin an sawisel a, hetiang boruak avang hian Foxx pawhin a thu post a delete leh a, heti hian thuphachawina a tichhuak leh ta nghal a ni. “Juda-te leh he ka thil post-in a tihnat zawng zawng te chungah thupha ka chawi e. Tunah chuan ka tawngkam hman khan pawia sawi thei tih ka hrechhuak tawh a, pawi ka tihpalh a ni. Ka tum reng vang a ni lo,” a ti.
Hetiang thu a post-na chhan sawiin, “Insawifiah ve reng reng nan, thian lem -in min phatsan a, chu chu ka sawi tum ber a ni, thildang a awm lo. Ka thinlung hian tute mah a thliar lo. Juda-te ka support-in ka ngaina em em a ni. He ka thu post avanga na te zawng zawng chungah thupha ka chawi tak zet a ni,” a ti.
He a thu post hian ‘like’ pawh a hlawh hman nual a, chung ‘like-tu’ zingah chuan Hollywood star dang Jennifer Aniston pawh a lo tel ve tlat mai a, ani pawh hian sawiselna a tawh ve tak avangin thupha a chawi ve leh ta a, “A va pawi thei tak. Ha post hi rilru tha lo pu emaw tihpalh thil emaw a ‘like’ ka ni lo. A pawimawh ber chu ka thiante leh he post-in a tihnat zawng zawng te hnenah hei hi chiang takin ka sawi duh- Juda-te huatna lam rawngkai reng reng ka support lo. Inhuatna lam chi reng reng chu ka pai dai thei lo. Chu zawng chu a ni e,” a ti ve bawk.
Jamie Foxx-a’n Instagram-a a thu post avangin Juda-te lakah thupha a chawi
