Samajwadi Party ten an candidate tur an puan hnu-ah INDIA bloc lama an thawhpui tur Janata Dal United (JDU) chuan Madhya Pradesh Legislative Assembly Election neih tura an candidate tur mi panga (5) hming an puang ve leh ta a, an thawhpui lian ber Congress Party chuan BJP atanga thuneihna lak sak an tum nasa hle.
JDU national general secretary Afaq Ahmed chuan he candidate list puan chhuah tak hi November ni 17-a seats 230 inchuh tura a hmasa ber tur list a nih thu a sawi a ni. Candidate-5 puan tak te chu – Chandra Pal Yadav (Pichhor), Ram Kunwar Raikwar (Rajnagar), Shiv Narayan Soni (Vijay Raghavgarh), Tol Singh Bhuria (Thandla), leh Rameshwar Singla (Petalawad) te an ni.
JDU Party thupuangtu Rahul Kumar chuan heng an candidate puan tak te hi hmun dang zela an candidate tur te awmlaia puan a nih thu a sawi a ni.
Hetihlai hian State BJP Vice President Santosh Pathak chuan JDU ten candidate tur an puan tak na chhan chu Madhya Pradesh election lo awm tura Congress party-in JDU te tana seat pek an hreh vang leh chumi laka an beidawnna hliahkhuhna mai a ni, tiin a sawi ve bawk a ni.
Rashtrya Janata Dal thupuangtu Mrityunjay Tiwari chuan INDIA bloc-a hruaitu pawimawh sang ber ber ten thil awmdan an thlithlai reng a, inthlan hun lo thleng sela a tul dan azir zelin engkim an rel fel zel ang a ti.
Thla thara inthlang mai tur Madhya Pradesh Assembly Election-a nomination file hun chu inrinni kal ta khan hawn tan a ni a. Shivraj Singh Chouhan-a hnuaia sorkarna kal mek Madhya Pradesh state election chu ni khatah zawh fel tur niin November 17 ah neih a ni ang a, Mizoram rualin December ni 3-ah vote chhiar a ni dawn a ni.
JDU-in an MP-a an Candidate tur puang
