Jeff Bezos leh Lauren Sanchez inneih senso
Khawvel pahausa top 3 a tel a ni bawk a, dollar maktaduai khat tih vel mai mai chuan a buai lo, Jeff Bezos leh Lauren Sanchez te chu vawiin hian Venice-ah an inkutsuih dawn ta a, mo lawm turin khawvel milar rualte an sawm khawm bawk a mo lawmna senso pawh a sang dawn talh talh khawp mai.
Venice khawpuia roreltu, Veneto regional government president Luca Zaia chuan reporter ten an kawmnaah nupa tuak thar turte hian an inneih senso zawng zawng atan sorkarah euro maktaduai 40-48 (dollar maktaduai 46.5-55.5) vel an chhun luh ngai dawn a hriat thu a sawi!
Bezos hausakna hi Bloomberg chuan dollar tluklehdingawn 238 angin an chhut a, chuta tanga dollar maktaduai 50 te chuan a sum tlang a tihêk pha vak lo ang!
Bezos leh Sanchez te hian mo lawm tura an sawmte chu thilpek engmah keng lo tura ngenin, an misawmte pualin donation an pe zawk dawn niin inneih sawmna card-ah an tarlang a, donation an pek turah hian Venice-a lagoon ecosystem vawnhimna lama thawktu CORILA-ah dollar maktaduai 1.2 an pe dawn niin report a awm a, hei bakah hian Italian chanchinbu Carriere della Sera, UNESCO Venice Office leh Venice International University-ah te pawh donation hi an pe dawn.
Mo lawm tura an sawmte phurh khawm nan private jet pawh 90 an hire a, water taxi 30 chuang an hire bakah an mikhual te thlen khawmna turin luxury hotel panga an book tawp bawk a, chung zingah hian 2014-a George Clooney leh Amal Clooney te inneihna hotel, Cipriani te pawh a tel.
Mo lawm programme vel hi engmah puanzar a awm lo nain, inneihna tak hi chu kum zabi 12-na a sak tawh, lawng hmunpui hriathlawh tak, Arsenale-ah June ni 28 hian neih a ni dawn a, mo lawm tura milar an sawm zingah Orlando Bloom, Kim Kardashian, Khloe Kardashian, Kris Jenner, Oprah Winfrey, Gaye King, Leonardo DiCaprio leh a tawih model Vittoria Ceretti, Tom Brady, Kendall leh Kylie Jenner, Ivanka Trump leh a pasal Jared Kushner, Usher, pahausa Bill Gates, Queen Rania of Jordan, fashion designer Domenico Dolce leh Tommy Hilfiger te pawhin niminpiah khan Venice an thleng tawh.
Jeff Bezos leh Lauren Sanchez inneih senso
