Mizoram aiawha Joint Electricity Regulatory Commission for Manipur & Mizoram member atana ruat Er Benjamin L Tlumte chu Ningani khan sawrkar laipuia Minister for Power, New & Renewable Energy RK Singh hmaah inbiak hmuh theihna hmanga rinawmna thuthiam la in lakluh a ni.
Electricity Regulatory Commission hi Ministry of Power hnuaia statutory body (quasi-judicial) niin, electricity kaihhnawih tinrengah state-a thuneitu sang ber a ni. Electricity Act, Rules, standard of performance a kenkawh bakah regulations leh tariff tichhuakin Manipur leh Mizoram state tan a thawk mek.
JERC for Manipur & Mizoram hi Electricity Act 2003 hnuaiah Ministry of Power bakah Manipur leh Mizoram sawrkar aiawhten memorandum of agreement siamin kum 20 chhung atan 2008 July 24 khan din a ni a, agreement a tawp hnuah chuan state pahnih tan a hran ve vea din a tul dawn a ni.
He Commission member-te pawh hi Ministry of Power thlan an ni a. Mizoram leh Manipur state aiawh member pakhat ve ve awmin, chairperson hi kumtin an inthlak a, tunah hian Manipur state aiawh R Thanga chu chairperson a ni mek.
JERC for Manipur and Mizoram member atana lakluh Er. Benjamin L Tlumte hi Power & Electricity department superintending engineer ni lai a ni a. He hna chelh tur thlanna hi All India Selection niin mi 32-in an dil a, Selection Committee-in uluk taka an zirchian hnu ah sawrkar laipuia Appointments Committee of the Cabinet pawmpui hnu in thlan a ni.
JERC member atan lalut
