Jessie J hnute cancer an zai
British singer, ‘Price Tag’ hla satunu, Jessie J, a hming tak Jessica Cornish chuan nimin khan a hnute cancer zai zawh a nih tawh thu leh in lamah inenkawl zuiin, result a ngaichang niin social media lamah a post.
Jessie J chuan an zai zawh atanga darkar 48 chhungin dinhmun that deuh leh hniam deuh chang te a awm niin a tarlang a, a damlo inenkawlna zinkawng te puan chhuah zel a tum thu sawiin, “Min enkawltu doctor leh nurse zawng zawng te leh ka chhungte leh thiantha min rawn tlawhtu zawng zawng te chu lawmthu ka sawi,” a ti bawk.
Jessie J hian tun thla tir khan Capital Summertime Ball chu a inzai hmaa a performance hnuhnung ber tur a nih thu a lo puan tawh ang ngeiin, Summertime Ball-ah hian inlamin, Wembley Stadium-a mipui 75,000 zet pungkhawm hmaah, “Vawiin hi hnute cancer natna ka hneh hmaah ka show hnuhnung ber tur a ni…Ka tan a hlu zual hle a, nangni leh ka career leh ka fapa avangin ka nunah hian vuina tur ka nei lo. Ka partner leh ka chhungte pawh,” a ti.
Jessie J hian June ni 3 khan hnute cancer a nei tih an hriatchhuah thu Instagram-ah a puang a, a cancer chungchang hi April thla-a a hla thar ‘No Secrets’ a tlangzarh hma lawkin an hrechhuak niin a sawi a, a cancer chu a intan tir deuh chauh a nih thu sawiin, “Engpawh nise cancer a nih tawh hi chuan a mi den dan a dang zar zel,” a ti.
Jessie J hnute cancer an zai
