JF-a chu tunge? mi tu emawin ti hu ta se, a bula mite nuih a za ngawt ang. JF-a chu hriat tura ngaih a ni!.
Mizo writer lar a ni a, a lar a ni mai lo, a pawimawh. A huhang a na a, khawvel a chhuahsan hnuah pawh a thu leh hlain Mizote a la khawih zel. A pianchamphaphak vawi 100-naah pawh amah ngaisangtute’n a pualin lehkhabu an buatsaih.
“JF-a tak kha aw” tih bu, JF-a pianchamphaphak vawi 100-na puala buatsaih, amah ngaisangtute buatsaih chu Inrinni khan I&PR Auditorium-ah an tlangzarh a, a tlangzarhtu hi JF-a fanu Lalthangzauvi a ni.
JF-a tia hriat lar, JF Laldailova kha 1925-ah Aizawlah a lo piang a, a kum 100 tlin lawm nana buatsaih “JF-a tak kha aw” tih bu hi PL Liandinga edit a ni. Mi 22-in an ziak a, an zinga pahnih, James Lianmawia leh R Lalrawna te tih loh mi dang zawng chu hmaichhana JF-a hmu lo vek an ni.
He lehkhabu hi JF-a chanchin, a kutchhuak zirchianna leh amah ngaihsan thute chuanna bu a ni a, “A bu han chhiar zawh meuh phei chuan JF-a rau hi a chan theih deuh hial nia mawle! A thenin JF-a min hrilh a, a thenin an fak a, a thenin min kawhhmuh a, a then erawh chuan JF-a piah lam thleng hian min hlui bawk,” tiin a tlangzarhna huna a bu thlirlawktu Dr H Laldinmawia chuan a sawi.
“A pian atanga a kum 100-na denchhenin, a thih atanga kum 50-na dawnah JF-a chuan ama ngen leh ngiat vang ni hauh lovin thawm a rawn nei leh ta a. A hring a hrana amah hre miah lotu leh amah pawhin a hriat ngai reng reng loh turte’n a tana an thiam lehj theihna hman an hre lo mai pawh ni lo, amah ngaisangtu leh a chungchang thu khel pha nih chu inchuan vena phak ang hiala an la ngai thei hi a mak. Chu chuan a thu leh hla thiltihtheihzia leh a influence natzia a tarlang awm e,” a ti bawk.
JF Laldailova khan kutchhuak a ngah a, ama irawm chhuak thuziak tha tak tak bakah lehlin lamah pawh a tangkaiin hming a chher hle. Khawvel thu leh hla tha tak tak a lehlinte chu vawiin thlengin hralh a la kal a, a lehkhathawn thlengin hralh a la kal.
Thu leh hla leh tawng lama duhtuina pawh mipui rilruah a tuh a, heti lama a sulhnu ringawt pawh hi mi tam takin amah an hriat rengna a ni. Chanchinbumi a ni bawk a, a hun laia Zoram khawvela chanchinbu lar Hun Thar a enkawl thin. Sap tawng dictionary a siam chu vawiin thlengin rinrawl a la ni tiin a sawi ngam ang.
1979 June ni 7-ah a boral a, a thih ni hian ruah sur nasa; ruah sur nasa tak karah mi thahnem takin an thlahliam a, chutih laia chief minister Brig T Sailo leh deputy speaker C Chawngkunga te pawhin pangparin an thlah a ni.
JF-a pianchamphaphak vawi 100-na pualin
