Jharkhand-a JMM kaihhruai coalition sorkar Chief Minister Champai Soren kaihhruai chuan February 5 khan Assembly-ah vote of confidence a paltlang.
Confidence motion-ah MLA 47 in an vote laiin Assembly member 81 awmnaah legislator 29 in a kalh zawngin an vote a, Independent legislator Sarya Roy erawh a hai a ni.
Vote thlak lai hian MLA sawmsarih pasarih an awm a. Ruling coalition ah hian JMM, Congress leh RJD MLA te telin pawn lam atangin CPIML(L) legislator-in a thlawp bawk.
BJP te hian legislator 26 neiin an thawhpui AJSU Party ten MLA pathum an nei bawk.
JMM legislature party leader Champai Soren chuan February 2 khan Jharkhand Chief Minister nihna chu Enforcement Directorate ten Hemant Soren money laundering case avanga an man hnuah a chelh a.
Champai Soren chu Chief Minister atana lakluh atanga ni 10 chhungin majority a neih leh neih loh house floor a fiah tura tih a ni zui a, February-ah a sorkar chu fiahin a awm ta a ni.
Hemant Soren chu ED custody ah awm mekin mahse special PMLA (Prevention of Money Laundering Act) court chuan vote thlak a phalsak angin vote a thlak a ni.
Ruling alliance legislator 38 te chu Congress rorelna Telangana khawpui Hyderabad-ah February 2 atang khan an inkulh a, a chhan ber pawh BJP ten an lei an hlauh vang a ni . Pathianni tlai khan Ranchi an let leh chauh a ni.
Jharkhand Assembly a trust vote neih hmain Chief Minister Champai Soren chuan a thlak tak chief minister chu ‘Hemant Babu’ tia sawiin a sorkar chu ‘hemant Soren Part 2’ a ni ang a ti zui bawk a.
Lung ina tang mek chief minister hlui Soren pawhin hun rei tak House-ah thusawina neiin Champai Soren chuan trust vote hmachhawn mahse Hemant Soren zawk chu sulsutuah a tang a ni.
Kum 48-a upa Kharkhand Mukti Morcha working president chuan a pa leh party founder Shibu Soren hnuaiah political career a tan a. Tun hnaia a political moves tuanrang tak avangin Jharkhand sorkar chu humhimin a awm tia sawi a ni. Hemant Soren chuan an state President’s rule a luh loh nan nalh takin chet a la a.
Chief Minister bo
Kar kalta Thawhtanni khan Enforcement Directorate te chuan Delhi a Hemant Soren chenna kalin an dap zui a. Official te chuan Soren awmna chin an hriat loh thu leh a staff te pawhin an hriat loh thu an sawi zui bawk.
Chu hun remchang chu BJP te chuan la vatin Chief Minister ‘a bo’ tia tlangau zuiin Jharkhand chuan constitutional crisis turu tak a tawk mek an ti zui a. Mahse, JMM te chuan Hemant Soren chu an biak pawh reng thu an sawi thung a. Chutih laiin Hemant Soren an Delhi a panna thlawhna chu airport-ah a in-park bawk si, ED official te chuan a awmna chin reng an hre si lo.
January 30 khan Hemant Soren chu Ranchi-ah lang hlawlin ruling coalition MLA te a hmu zui nghal a. A lan danah Soren chuan media, enforcement directorate leh tool booth camera te bum vekin 1,300 km laia thui vehicle a chuangin Delhi atangin Ranchi him takin a lut a ni.
Jharkhand Assembly Opposition leader Babulal Marandi phei chuan Soren chuan Delhi a chenna chu ke in zanlaiah a chhuahsan a ti zui a. Engtiangin nge Soren chuan ED official ten a chenna in an dap dawn tih leh chu mi hma ni chiaha a chhuahsan theih dan chu hriat a ni lo.
Nilaini kal ta thleng khan ED official te chuan money laundering case-ah Hemant Soren chu thu an zawt fiah zui a. A lan danah an man dawn chiang tih a chian hnuah huaisen takin a sorkar him nan hma la zuiin Chief Minister atanga a ban hma chuan arrest memo-ah a hming a ziah hnan duh ta tlat lo. Chief Minister ni lai man a nih chuan state-ah constitutional crisis a awm dawna President’s rule puan mai theih a ni dawn si a ni.
Memo-ah hming a ziah hnan duh tlat loh avangin ED official te chuan hemant Soren chu Governor’s residence-ah an hruai ta a. Governor residence an thlen chuan legislator rual ten an lo hmuak a. Hemant Soren a ban rual rualin Champai Soren chuan sorkar a siam theih thu a sawi zui ta a ni.
A hma lawkin Champai Soren chu JMM legislative party leader atana thlan niin, Hemant Soren-an a nupui Kalpana chu chief minister atan a dah dawn tia sawi thawm chu hmehmihin a awmzui ta bawk.
January 31-a Hemant Soren a ban a, Champai Soren-an sorkar a siam theih thu a sawi hnuah pawh Governor CP Radhakrishnan chuan sorkar thar a la lut duh mai lova, a tikhawtlai tiin JMM leh Congress te chuan an puh a.
February 1 khan Champai Soren chuan Governor hnenah lehkhathawnin Jharkhand ah darkar 18 sorkar a awm tawh loh thu sawiin rang taka amah la lut turin a ngen a. A tuk lawkah Governor chuan sorkar thar chu a lalut ta a ni.