Nigeria khawthlang lam, Kwara state governor chuan khaw pahniha cheng eng emaw zat chu ‘thurin man tak zirtira kal firfiak takte’ hnena an inpek duh loh avanga rawng taka kah an ni a, tam tak an thi niin a sawi.
Governor AbdulRahman AbdulRazaq-a hian Thawhlehnia khua rûnnaah ‘Muslim 75 rawng taka suat’ niin a sawi a, an state-a politic hruaitu erawh chuan mi 78 an phum tawh a, mi ruang dang pawh hmuh belh zelin 170 pawh an tling mai thei niin a sawi thung.
Islamist hel, Boko Haram chu a tituah puh an ni a, President Bola Tinubu-a chuan sipai battalion a tir nghal bawk.
Woro leh Nuku khuaa inthahna bakah hian Kwara state house of assembly-a member ni lai, Saidu Baba Ahmed-a chuan mi 38 ruk bo an ni a, mi eng emaw zat an biruk hlain an in leh dawr halsak an ni bawk tih a sawi.
Khua beihna hi tlai dar 05:00 velah tanin darkar thum/li vel a awh niin mi cheng pakhat, Abdulla Umar Usman chuan BBC a hrilh.
Ahmed-a chuan heng lai velah hian Boko Haram an che na telh telh a, mi an beihte hi khawtlangin Islam an zirtir dan duh lotute an ni thin tih a sawi.
Islamist pawl hian khawtlang hnenah an thlen tur thu lehkhain an hrilh a, thuhrilh an duh thu an sawi a; khuaa miten an lo hnial a, tual chhunga venhim hna thawktuten an awmchilh thin niin a sawi.
Thil thlenna hi a kilkhawr avangin eng zat chiah nge hriat a har hle.
Kwara-a Red Cross thuneitu, Babaomo Ayodeji chuan ‘thi hi mi 162 an ni tawh a, ruang zawn zel a ni’ tih AFP a hrilh.
Amnesty International pawhin mi 170 chuang thi angin an sawi a, tam tak chu hnai tê atanga kah leh a nung chunga hal niin an sawi.
Tun hnaiah Boko Haram atanga peng hrang jihadist-te hi Kwara-ah an che nasa hle a, mi an that a, motorcycle-ah chuangin bazar leh khaw vengtua dahte an bei nasa hle.
Thawhlehni vek khan hmar lama Katsina state-a Doma khuaah mi 21 thah an ni bawk niin Amnesty chuan a sawi a. Hemi ni vek khan hmarchhaka Borno state-ah Boko Haram ni ngeia hriatten mi 17 an that bawk.
Tun tuma beihna hi American sipaite Nigeria-ah an lut tih puan a nih hnua thleng a ni a. Defence Minister Chrisopher Musa-a chuan US sipaiten an ramah an lut tih hi a sawi a. A hnu lawkah, Thawhlehni khan US Africa Command (Africom) Gen Dagvin Anderson chuan Nigerian sorkar ngenna angin sipai an lut tih a sawi bawk.
Nigeria hian himna kawngah hmachhawn hautak tak tak a nei reng a. US sipaite leh an sipaite hian training programme leh nunchan pawh an lo zirho thin tawh bawk.
Tun hnaiah US sipaite hi lut thuk zualin Krismas ni khan hmarchhaka hel pawl camp pahnih, Lakurawa pawh an kap a. Hei hi Foreign Minister Yusuf Tuggar-a chuan president pawhin a hriatpui thu leh an sipaite pawh an tel ve thu a sawi.
Hemi hnuah hian ram pahnih hi beihpui thlaknaah thuk lehzuala inkawpin thla hmasa khanUS hian venhimna kawnga mamawhte pawh a thawn.
Jihadist-a tel tura tihna zawm duh lo khaw pahnih rûn
